Индонезия президенти коррупционерлар учун қамоқхона қурилишини эълон қилди

Индонезия президенти Прабово Субианто алоҳида оролда қамоқхона қуриш учун бюджетдан маблағ ажратишга оид режаси билан бўлишди. Ушбу қамоқхона мамлакатда коррупцияда айбланган жиноятчилар учун мўлжалланган.

«Мен коррупционерларга қарши курашдан чекинмайман. Улар мен бу миллат ва бу давлат учун ўлишга тайёр эканимни билишлари керак. Мен мафиядан қўрқмайман, чунки полиция бошлиғи, ҳарбий қўмондон ва ўқитувчилар менинг томонимда», — деди Субианто.

Президентнинг таъкидлашича, давлат маблағларини ўзлаштиришдан энг кўп ўқитувчилар, шифокорлар, тиббиёт ходимлари ва фермерлар азият чеккан.

Шу нуқтаи назардан, у давлат муассасаларида бюджет самарадорлиги бўйича ўзининг кўрсатмаси аслида давлат маблағларининг фақатгина одамлар фаровонлигини ошириш учун ишлатилишини таъминлашга ва уларнинг масъулиятсиз субъектлар томонидан нотўғри ишлатилишидан ҳимоя қилишга қаратилганини таъкидлади.

Бюджет қисқаришларига бўлган эътирозларни эътироф этган ҳолда, президент ўз маъмурияти Индонезия халқининг турмуш даражасини оширишга бўлган садоқати туфайли тўғри йўлда эканини билдирди.

Индонезия етакчиси ушбу баёнотни ҳудудларда давлат хизматчиси мақомига эга ўқитувчиларга бериладиган имтиёзларни тақсимлашнинг янги механизмини ишга тушириш чоғида айтиб ўтди.

Субианто бундан олдин ҳам бир неча бор мамлакатда коррупцияга қарши курашиш режалари ҳақида гапирган эди.