АҚШда оққуш гавжум шоссега югуриб чиқиб, автомобиллар ҳаракатини деярли тўхтатиб қўйди (видео)

Флоридада гавжум автомобил йўлига югуриб чиқиб, транспортлар ҳаракатни деярли бутунлай тўхтатиб қўйган оққуш қутқарилди. Воқеа жойидан олинган кадрларни маҳаллий Wesh телеканали эълон қилди.

Орландо полицияси ходимларига йўлга югуриб чиққан оққуш ҳақидаги хабарлар келиб тушган. Улар ҳодиса жойига етиб келишгач, қушни тутишга уринган, аммо бу осон кечмаган.

Кузатув камераларидан олинган тасвирларда бир нечта полициячи қутқарувчилардан эпчиллик билан қочаётган оққушни қувлаётгани кўринади. Шу билан бирга, қувлаш пайтида барча йўл чизиқлари тўсилгани сабабли, атрофдаги йўналишларда транспорт ҳаракати деярли тўхтаб қолган.

Охир-оқибат оққушни тутиб, катта чойшабга ўрашди. Қуш яқин атрофдаги кўлда яшаши тахмин қилинмоқда. Оққушлар бўйича мутахассиснинг айтишича, ҳозир оққушларнинг жуфтлашиш мавсуми бўлгани учун, қуш “автомагистралга осонгина учиб кирган бўлиши мумкин”.

Ушбу воқеа оқибатида тан жароҳати олганлар ёки бахтсиз ҳодисалар қайд этилмаган.