Покистонда сепаратистлар йўловчи поездини ўққа тутиб, 450 дан ортиқ одамни гаровга олди

«Балужистон озодлик армияси» сепаратистлари Покистон жануби-ғарбидаги йўловчи поездини ўққа тутди. Бу ҳақда гуруҳ баёнотига таяниб Reuters хабар берди.

Отишма оқибатида поезд машинисти яраланган ва йўловчилар гаровга олинган.

Қайд этилишича, поезд Кветта шаҳридан Покистоннинг Хайбар-Пахтунхва вилояти томон ҳаракатланаётган бўлган.

AFP’нинг Кветта шаҳри амалдорига таяниб ёзишича, жангарилар 450 дан ортиқ йўловчини гаровга олган. Маълумотларга кўра, жангарилар гуруҳи темирйўлни портлатиб, «Сиби туманидаги поездни назорат қилмоқда». Полиция ходимига кўра, Кветтадан ҳаракатланган поезд «тоғлар билан ўралган туннел олдида» қолиб кетган. Яқин атрофдаги шифохоналарда фавқулодда ҳолат режими жорий этилган.

Балужистон — Покистоннинг энг йирик ва энг қашшоқ вилоятларидан бири. Минтақада ўнлаб йиллардан бери сепаратистлар гуруҳи фаолият юритиб келади. «Балужистон озодлик армияси» 1970 йилларда ташкил этилган. Аъзолари томонидан уюштирилган ҳужумлар учун улар Покистон, АҚШ, Буюк Британия, Евроиттифоқ ва Хитойда террорчилик гуруҳи дея тан олинган.

Эслатиб ўтамиз, 2024 йил 9 ноябр куни Балужистон вилоятидаги темирйўл вокзалида худкуш ўзини портлатиб юборганди. Портлаш юздан ортиқ инсонлар поезд кутиб турган Пешавор станциясида содир бўлган ва оқибатда 24 киши ҳалок бўлган эди. «Балужистон озодлик армияси» сепаратистик гуруҳи теракт учун жавобгарликни ўз зиммасига олган.