“Ҳазм қилишни яхшилайди, одамни тўқ тутади” – нишолда қандай тайёрланади?

Марғилонлик Анвар ота Исмоилов учун қўли-қўлига тегмайдиган кунлар аллақачон келган. Муборак Рамазон ойида қандолатчи бошқа ишини йиғиштириб, нишолда тайёрлашга ўтади. Тайёрлаган нишолдалари водий вилоятларидан ташқари Тошкент ва қўшни Қирғизистонда сотиляпти.

{Yii::t(}

Ўтказиб юбориш 6s

Ўтказиб юбориш

Қандолатчи отахон нишолда нима учун Рамазон ойида истеъмол қилиниши-ю, қандай тайёрланиши ҳақида сўзлаб берди:

“Нишолда тайёрлашни 10 яшарлигимдан бошлаганман. Бу ҳунарни раҳматли отам ўргатган. Рамазонда нишолда бежиз истеъмол қилинмайди. Ошқозонни тўқ тутади, танага фойдали. Ҳазм қилишда ошқозонга кўп ёрдам беради бу неъмат. Умумий қилиб айтганда, нишолда табиий оқсил ҳисобланади. Нишолданинг таркиби шакар, етмак томири, тухумдан иборат. 10 кг нишолда тайёрлаш учун 10 кг шакар, 3 чинни косада етмак томири суви ва 10 дона тухум сарфланади. Етмак томирини қайнатиб олиб сариғидан ажратилган тухум оқи билан қўшиб, мис идишга солинади ва суюқлик махсус беҳи дарахти шохидан тайёрланган чилчўп билан урилади. Кўпиклар катталашгач, унга қиём солинади. Маълум бир жараёндан ўтган масаллиқлар жамланмасидан нишолда пайдо бўлади.

Техника асрида яшаяпмиз. Авваллари нишолда фақат чилчўп билан уриб тайёрланар эди. Энди эса турли дастгоҳлар чиқиб кетди. Кўпчилик шу дастгоҳга ўтиб олган ҳозир. Лекин чилчўпда уриб тайёрланган нишолда таъми барибир бошқача бўлади.

Нишолдаларимиз Фарғона, Андижон, Наманган, Тошкент, ҳатто қўшни республикаларга ҳам улгуржи нархларда сотиляпти. 60 ёшни қарши оляпман. Яратган муборак Рамазон ойида куч-қувват бериб турибди. Нишолдалар тайёрлаб, халқимиз дуосини олиб юрибмиз, шукрлар бўлсин”, дейди Анвар Исмоилов.

Сарвар Зиёев,
Kun.uz
Оператор ва монтажчи – Сардор Мамиров.