«МЮ» «Арсенал»га қарши, «Сити» учун 3-ўринга кўтарилиш имконияти. Ҳафта ўйинлари анонси

НОТТИНГҲЕМ ФОРЕСТ – МАНЧЕСТЕР СИТИ (8 март, 17:30)

«Манчестер Сити» ушбу мавсумда жуда кўп инқирозли даврларни бошдан кечирган, беқарор натижалар кўрсатаётган бўлса-да, бадтарроқ аҳволдаги топ-клублар туфайли, бемалол шу турдаёқ учинчи ўринга чиқиб олиши мумкин. Бунинг учун Пеп Гвардиола шогирдлари сафарда «Ноттингҳем Форест» устидан ғалаба қозонса кифоя.

Бошқа томондан ўйиннинг айнан Ноттингҳемда бўлиб ўтиши томонлар мувозанатини жиддий равишда мезбонлар фойдасига оғдиришини ҳам айтиб ўтиш керак. Сабаби, ушбу мавсумда «шаҳарликлар» айнан сафар ўйинларида яхши ўйнай олмаяпти – ўтказилган 14 сафар ўйинининг атиги олтитасида «Манчестер Сити» ғалаба қозонган холос. «Ноттингҳем» эса уйда ёмон эмас – мавсум давомида атиги икки маротаба мағлубиятга учраган холос. Сўнгги икки ўйинда «Брайтон» устидан 7:0 ҳисобидаги ғалаба, «Арсенал» билан дуранг ҳам бугун меҳмонларга осон бўлмаслигидан далолат қилади. Ўтган мавсумда «Манчестер Сити» бу ердан 2:0 ҳисобидаги ғалаба билан кетган бўлса-да, ўйиннинг мазмуни мутлақо тескари кечган, мезбонлар яққол устунлик қилиб, фақат жуда кўп вазиятлардан аниқ фойдалана олмаганди. Ундан олдинги мавсумда эса 1:1 ҳисоби қайд этилган.

Жароҳатларга келадига бўлсак, «Манчестер Сити» таркибида марказий ҳимоячилар тақчиллиги юзага келган. Натан Аке ва Аканжи катта эҳтимол билан бу мавсумда майдонга туша олишмайди. Жон Стоунзнинг қайтишига ҳам камида бир ой вақт бор. Шунингдек, мавсум бошида жароҳат олиб сафдан чиққан яримҳимоячи Оскар Боб тикланиш жараёнида экани айтилаётган бўлса-да, катта эҳтимол билан терма жамоалар билан боғлиқ танаффусдан сўнг сафга қайтади.

Бу ўйинда ҳам ҳамюртимиз Абдуқодир Ҳусановнинг илк дақиқалардан майдонга тушишини кутишга асосларимиз етарли. Биринчидан, юқорида тилга олинганидек, шундоқ ҳам таркибда марказий ҳимоячилар у ва Диашдан бошқа йўқ. Иккинчидан, рақобат муҳитида ҳам, Абдуқодирнинг сўнгги ўйинларни юқори даражада ўтказгани ва ҳатто клубда феврал ойининг энг яхши футболчиси деб топилгани бежиз эмас. Бу ерда энг муҳими, Ҳусановнинг ўша мудҳиш дебютдан кейин ўзини қўлга олиб, кейинги имкониятлардан максимал фойдаланиб, жамоаси учун ҳатто энг муваффақиятсиз ўйинларда ҳам порлаб, мана шу сўровномадаги учликка кира олгани. Бу тўлиғича Абдуқодирнинг меҳнати ва натижаси. Ишонаверинг, биз уч ой олдин унинг Манчестерга ўтишига қанчалик ишонқирамаган бўлсак, «Челси» билан ўйиндан кейин бу даражага тез фурсатда келишини тасаввур ҳам қилолмасдик. Абдуқодирнинг бизни доим ҳайрон қолдириши, энг чўққига чиқди, деганимиздаям, яна устига нимадир қила олиши таҳсинга лойиқ.

БАРСЕЛОНА – ОСАСУНА (9 мартга ўтар кечаси, 01:00)

Рақиб ким бўлишидан қатъи назар, айни палладаги ҳар бир учрашув «Барселона» учун жуда муҳим. Чунки жамоа турнир жадвалида биринчи поғонага чиқиб олди ва одатда, Фликнинг «Барселона»си айнан чемпионлик характерини кўрсатиб, барқарорлик кўрсатиши керак бўлганда панд бериб қўйган ҳолатларни олдин ҳам кўргандик. Қизиғи, шунақа илк ҳолат айна «Осасуна»га қарши биринчи даврадаги ўйинда содир бўлганди. Ла Лигада юз фоизлик натижа кўрсатиб борган мураббий илк маротаба бироз ротация қилишни хоҳлаган ва Ламин Ямал, Рафиня каби футболчиларга дам берганди. Аммо «Осасуна» жуда кучли ўйнаб юбориб, 4:2 ҳисобида ғалаба қозонганди. Иккинчи таймда барча етакчиларнинг майдонга тушиши ҳам ёрдам бермаган. Умуман «Осасуна» сўнгги йилларда Барселонадаги ўйинларда ҳам муносиб қаршилик кўрсатаётганини ҳам таъкидлаш керак. Охирги икки ўйин мезбонларнинг атиги 1:0 ҳисобидаги ғалабаси билан якунига етганди.

Бундан ташқари, каталонияликлар уч кун олдин Чемпионлар Лигасида қийин учрашув ўтказганини ҳам эътиборга олиш керак. Жамоа ғалаба қозонган бўлса-да, жуда кўп ҳимояланишига тўғри келди, деярли бутун учрашувни бир киши кам бўлиб ўтказишга мажбур бўлди. Табиийки, жисмоний томондан бу фактор ҳам ўзига яраша таъсир ўтказиши мумкин. Қисқаси, бугунги ўйиннинг натижасида олдиндан аниқ тахмин қилиш қийин. Қандайдир сценарий меҳмонларга ҳам имконият тақдим этиши эҳтимоли бор.

Жароҳатларга тўхталадиган бўлсак, мезбонлар сафида аввалдан узоқ муддатга сафдан чиққан ва деярли бу мавсум майдонга тушмаётган Кристиансен ва Берналдан бошқа ҳамма тайёр. Табиийки, Флик бўлиб ўтган Чемпионлар Лигаси ўйини, шунингдек, келаси ҳафта «Бенфика» билан жавоб ўйини ҳам борлигини инобатга олиб қандайдир ўзгаришлар амалга ошириши мумкин. Албатта, аввалги мана шундай қарор ўзини умуман оқламаганини ҳам унутмаган ҳолда. Меҳмонлар сафида эса Аймар Ороснинг майдонга туша олмаслиги жиддий йўқотиш. Ҳужумкор яримҳимоячи «Валенсия»га қарши кечган сўнгги турда (3:3) дубл қайд этиб, учрашувнинг энг яхши футболчиси деб топилганди.

МАНЧЕСТЕР ЮНАЙТЕД – АРСЕНАЛ (9 март, 21:30)

Айтиш мумкинки, жамоалар ушбу ўйинга турлича мақсад ва ҳолатларда етиб келмоқда ва катта эҳтимол билан «Арсенал» жамоаси учун бу учрашув кўпроқ аҳамиятга эга. Қизиғи, сўнгги йилларда доим шундай бўлмоқда, эстингизда бўлса, «Олд Траффорд»да рақиблар ўтган мавсумнинг сўнгги турларида тўқнаш келишган, чемпионлик учун курашаётган «Арсенал»га фақат ғалаба керак, «МЮ» эса жадвал ўрталарида бўлиб, фақат ҳалақит бериш учун майдонга тушганди холос.

Бу сафар ҳам ўхшаш вазият. «Арсенал» агар бу сафар ҳам очко йўқотса, чемпионлик умиди билан хайрлашса ҳам бўлади, «Манчестер Юнайтед» эса ҳатто еврокубоклар зонасидан ҳам анча узоқда. Шунингдек, мезбонларнинг айни дамдаги спорт формаси катта муаммога айланганини ҳам таъкидлаш лозим. Жамоа ўтган ҳафта «Фулҳэм» билан Англия кубогида 120 дақиқа ўйнади, пайшанба оқшомида эса Соседадга сафар қилди. Бир қараганда, одатий режим, лекин айни пайтда таркибда жароҳатлар жуда кўп бўлиб, Аморим ҳар бир ўйинда деярли бир таркибни туширишга мажбур бўлаётганини ҳам айтиш лозим. Эванс, Байиндир, Магуайр, Шоу, Маунт, Мартинес, Амад, Угарте каби футболчиларда турли даражадаги жароҳатлар бор. Шунинг учун сўнгги ўйинларда захира ўриндиғида ҳатто белгиланган миқдордаги футболчилар ҳам жой олишмаяпти. Соседаддаги ўйин охирларида ташаббуснинг бериб қўйилиши ҳам айнан футболчиларнинг чарчаб қолгани билан боғлиқ эканини Рубен Аморим ҳам таъкидлади.

Хўш, бу ўйинда мураббий қандай ўзгаришларни амалга ошира олади? Юқорида санаб ўтилганлардан ташқари, Патрик Доргу ўтган турдаги қизил карточкаси туфайли майдонга туша олмайди. Шунингдек, Европа Лигасида жавоб ўйини борлигини ва бу мавсумда «МЮ» учун ушбу турнир АПЛдан ҳам муҳимроқ эканини таъкидлаш керак. Зеро айнан ушбу мусобақада ғалаба қозониб мавсумни қайсидир маънода қутқариб қолиш мумкин. Шундан келиб чиқсак, Аморим Угарте ва Магуайр борасида ҳам рискка бормаслиги, кейинги ўйин учун асраши мумкин. Бундан ташқари, «Ипсвич»га қарши ўйинда майдонга тушиб, илиқ таассурот қолдирган Чидо Оби Мартинга илк дақиқалардан имконият берилиш эҳтимоли катта. Чунки у Европа Лигасига заявка қилинмаган, демак Хойлундга дам берилиши мумкин. Албатта у ва ҳимояда пайдо бўлиши мумкин бўлган Хавенларни «Арсенал»га қарши тушишлари қизиқ бўлади, чунки ҳар икки ёш футболчи айнан «Арсенал»дан трансфер қилинган.

Жароҳатлар «Арсенал» учун ҳам бошоғриғи бўлиб турибди, айниқса, ҳужум чизиғидаги йўқотишлар чемпионлик курашида энг катта пандни берди деб ҳам айтса бўлади. Мартинелли, Жезуз, Ҳаверц ва Сака жамоа ҳужумчилари ичида саналадиган илк тўрт ном, ҳаммаси ўйнай олмайди. Шундай бўлса-да, Нидерланияда «ПСВ»га қарши ўйин шуни кўрсатдики, жамоада гол урувчилар етарли ва агар «Арсенал» ўз ўйинини намойиш қила олса, «Олд Траффорд»да муаммога дуч келмаса керак. Бунинг устига шу йилнинг бошида айнан «Манчестер Юнайтед» «Арсенал»ни Англия кубогидан чиқариб юбориб, соврин ютиш имкониятидан маҳрум қилганини унутмаслик керак.

ЮВЕНТУС – АТАЛАНТА (10 мартга ўтар кечаси, 00:45)

Италия футболини сал узоқроқдан кузатаётган мухлисларни ҳайрон қолдирадиган факт – агар бугун «Ювентус» «Аталанта» устидан ғалаба қозонадиган бўлса, бергамоликларга етиб олади. Қизиғ-а, умумий тасаввурда «Аталанта» бу йил А Серияда энг кучли ўйин намойиш этаётган, узоқ вақт пешқадамлик қилган жамоа, «Ювентус» эса янги мураббий билан қийинчиликлар остида ўйнаб келаётган жамоалар деб ўйлаймиз, аммо қаранг, қаторасига 5 ғалабадан сўнг туринликлар тепадаги жамоаларга яқинлашиб олишди ва ҳатто айтиш мумкинки, чемпионлик учун курашиб кўрса бўлади. Ахир пешқадам «Интер» билан фарқ атиги 6 очко холос. «Интер» «Ювенус»дан фарқли равишда чемпионатдан ташқари Чемпионлар Лигаси ва Италия кубогида қатнашаётгани, келаси турларда эса «Аталанта» меҳмони бўлишини инобатга олсак, «Ювентус»да босим ўтказиш учун айни муддао. Бунинг учун бу ўйинда ғалаба қозониш шарт.

«Аталанта» эса текис жойда барчасини бой бериб қўймоқда. Аслида Гасперини шогирдларида айни дамда Италия чемпионатида якка пешқадам бўлиб олиш ва Чемпионлар Лигаси чоракфиналчиси бўлиш учун у қадар катта қаҳрамонлик шарт бўлмасди. Аввалига «Брюгге»га қарши плей-офф ўйинлари умуман кутилмаган натижа билан якунланди, кейин эса А Серия доирасида «Каляри» ва «Венеция» билан уй ўйинларидаги дуранглар чемпионлик учун курашаётган жамоа учун ярашмайди. Гасперини ва Лукман ўртасидаги кичик зиддият эса шундоқ ҳам масъулиятли паллада халақит бергани шубҳасиз.

Жамоаларнинг Италия чемпионати доирасидаги охирги 3 ўйини дуранг билан якунланган. Шунингдек, жамоалар ўтган мавсум охирида кубок финалида ҳам тўқнаш келишган ва ўйин 1:0 ҳисобида туринликларнинг ғалабаси билан тугаган. Ўзи умуман олганда ҳам, «Аталанта»нинг «Ювентус»га қарши статистикаси жуда ёмон – А Серияда охирги 27 ўйиндан атиги 2 марта мағлуб эта олган холос. 11 ўйин дуранг билан тугаган. Яна бир қизиқ факт, «Ювентус» ушбу мавсумда ўз майдонида ютқазмаган ягона жамоа саналади, аммо бу ўйинларнинг ярми дуранг билан тугаганини ҳам таъкидлаш керак. «Аталанта» эса А Серияда сафар ўйинларида энг кўп очко тўплаган жамоадир.

Таркибларга тўхталадиган бўлсак, ҳар икки томонда ҳам йўқотишлар кўп бўлса-да, ўйинга жиддий таъсир қиладиган асосий футболчилар эмас. Қайсидир жиҳатдан Луис ва Чико Консейсаунинг йўқлиги билиниши мумкин, ҳа, аммо Гатти, Милик, Бремер каби номлар жарангдор янграса-да, «Ювентус» бу мавсумда кўп ўйинларни уларсиз ўтказмоқда. Меҳмонлар сафида Штефан Пошнинг йўқлиги кўпроқ билиниши мумкин. Шунингдек, Малдини, Куссуну ва Скалвинилар ҳам шерикларига ёрдам бера олишмайди.

БОШҚА ЎЙИНЛАР

8 март. БАЙЕР – Вердер (19:30), БАВАРИЯ – Бохум (19:30), БОРУССИЯ – Аусбург (19:30), ЛИВЕРПУЛ – Саутҳэмптон (20:00), Ренн – ПСЖ (21:00) Лечче – МИЛАН (22:00), Брентфорд – АСТОН ВИЛЛА (22:30), ИНТЕР – Монца (9 мартга ўтар кечаси, 00:45)

9 март. Хетафе – АТЛЕТИКО (18:00), НАПОЛИ – Фиорентина (19:00), ЧЕЛСИ – Лестер (19:00), ТОТТЕНҲЭМ – Борнмут (19:00), РЕАЛ – Райо Валекано (20:15).