АҚШда 15 йил ичида биринчи марта ўлим жазоси отув йўли билан амалга оширилди

АҚШда бейсбол таёқчаси билан икки кишини ўлдирган 67 ёшли эркак отиб ўлдирилди. Маҳкумнинг ўзи бу қатл усулини танлаган. Бу АҚШда сўнгги 15 йилдаги биринчи ва деярли ярим асрдаги тўртинчи отувдир.

Фото: AP

Қўшма Штатларда 15 йил ичида биринчи марта отиб ўлдириш билан ўлим жазоси амалга оширилди. Бу ҳақда 7 март, жума куни Жанубий Каролина жазони ижро этиш департаменти ижтимоий тармоқларда маълум қилди. «Бред Кит Сигмон бугун соат 18:05 да отиб ўлдирилган ва шифокор унинг ўлимини соат 18:08 да тасдиқлаган», — дейилади хабарда.

Маҳкумнинг ўзи қатл усулини танлади

Associated Press (AP) маълумотларига кўра, Сигмон қатл этилганда 67 ёшда эди, 2001 йилда у ўзининг собиқ севгилисининг ота-онаси Девид ва Гледис Ларкни бейсбол таёқчаси билан ўлдирган.

Адвокатларнинг таъкидлашича, Сигмоннинг ўзи қатл қилиш усули сифатида отувни танлаган. Маҳкум электр курсисидан ёки ўлимга олиб келадиган инъекциядан бош тортди.

AP хабарига кўра, Сигмонни қатл хонасига олиб киришган ва стулга ўтқизишган. Отув маҳкум ёки гувоҳларга кўринмаслиги учун девордаги тешиклардан ўт очишган.

Отиб ўлдириш - АҚШда қатлнинг кам учрайдиган шакли

AP ёзганидек, Қўшма Штатларда отиб ўлдириш камдан-кам учрайдиган қатлдир. Сигмон иши мамлакатда 1977 йилдан бери содир бўлган тўртинчи отув бўлди. Ҳаммаси бўлиб, бу даврда 1500 дан ортиқ одам қатл этилган, уларнинг аксарияти ўлимга олиб келадиган инъекция орқали ўлдирилган.

Қатлдан олдин бир гуруҳ намойишчилар қамоқхона олдида тўпланиб: «Ҳар бир ҳаёт бебаҳодир» ва «Адолатни ўрнатинг, одамларни ўлдирманг» деган ёзувлар билан чиқишди.

#АҚШ #ўлим жазоси