Писториус: АҚШнинг Киевга тўхтатилган ёрдамини қоплаб берамиз

Германия ва Украинани қўллаб-қувватловчи бошқа давлатлар, Германия мудофаа вазири Борис Писториуснинг сўзларига кўра, АҚШдан етишмаётган ёрдамни катта даражада қоплаш ниятида. «Биз, албатта, Америка кўмагини янги ёрдам чоралари орқали, ҳеч бўлмаганда сезиларли даражада қоплашга интиламиз», деди Писториус 6 март, пайшанба куни Украина мудофаа вазири Рустем Умеровнинг Берлинга ташрифи чоғида. Хусусан, у Киевга артиллерия снарядлари ва Американинг Starlink сунъий йўлдош тармоғи каби алоқа воситаларини ваъда қилди.

Писториус Қўшма Штатларни Украинага ҳарбий ёрдамни «бир кечада» тўхтатиб қўйгани учун танқид қилди. Шу билан бирга, у Германия «Украина томонида қолаётганини ва бу ҳозир ҳар қачонгидан ҳам муҳимроқ» эканини таъкидлади. Германия мудофаа вазири, шунингдек, Берлин Украинанинг ҳаво ҳужумидан мудофаа ва қуруқликдаги кучларини мустаҳкамлашга эътибор қаратишда давом этишини таъкидлади.

Унинг таъкидлашича, немис таъминоти «доимий ва ишончли» амалга оширилмоқда. «Агар бирор нарсани эълон қилсак ва унга маблағ ажратсак, у етказиб берилади», деб ишонтирди Писториус. Шу муносабат билан у Германиядаги бўлажак ҳукмрон коалициядаги истиқболли ҳамкорлар — христиан партиялар блоки ХДИ/ХСИ ва социал-демократлар ўртасидаги келишувни эслади, унга кўра ялпи ички маҳсулотнинг 1 фоизидан ортиқ бўлган барча мудофаа харажатлари қарз олиш бўйича бюджет чегарасига («қарз тормози» деб аталади) бўйсунмайди. Бу амалда Бундесверни молиялаштириш учун чексиз кредитларни англатади.

Европа ҳамкорлари билан келишилган ҳолда

Борис Писториуснинг сўзларига кўра, Германия Украина учун «ҳал қилувчи паллада» Европадаги ҳамкорлари билан ўз ҳаракатларини яқиндан мувофиқлаштирмоқда. Американинг етишмаётган ёрдамини қоплаш чораларини келишиб олиш учун Писториус британиялик ҳамкасби Жон Хили билан биргаликда Украина бўйича алоқа гуруҳини бошқаришда давом этишга келишиб олди. Кейинги учрашув режалаштириш босқичида.

«Биз Украинани фаол қўллаб-қувватлашда давом этамиз, шунда у ҳатто мана шундай оғир дамларда ҳам ўз кучини сақлаб қолиши ва шу позициядан туриб ҳаракат қилиши мумкин», — дея таъкидлади Писториус.

Ўз навбатида, Украина мудофаа вазири Рустем Умеров Германия аллақачон ўз мамлакатига 20 миллиард евро миқдорида ҳарбий ёрдам берганини таъкидлади. Бу Европа ёрдамининг 37 фоизини ва барча мамлакатлардан келган ҳарбий ёрдамнинг 16 фоизини ташкил қилади. Умеров Германиянинг ёрдами, айниқса, Украинани ҳаво ҳужумларидан ҳимоя қилиш учун муҳим аҳамиятга эга эканлигини таъкидлади.