Ливитт: Украинларнинг қочқинлик мақомидан маҳрум этилиши ҳақидаги хабар - фейк

Оқ уй матбуот котиби Кэролайн Ливитт 6 март, пайшанба куни Reuters агентлигининг Трамп маъмурияти 240 мингга яқин украиналик қочқиннинг вақтинчалик мақомини бекор қилмоқчи эканлиги ҳақидаги хабарини рад этди.

«Бу Reuters агентлигининг нима ҳақида гапираётганини билмайдиган аноним манбаларга асосланган яна бир фейк хабаридир. Ҳақиқат шуки, ҳали ҳеч қандай қарор қабул қилинмаган», деб ёзган Ливитт X ижтимоий тармоғида.

Аввалроқ Reuters манбаларига таяниб, Трамп маъмурияти 2025 йилнинг апрелида украиналик қочқинлар учун вақтинчалик мақомни бекор қилишни режалаштираётгани ҳақида хабар берган эди. Бу Украина фуқароларига тезлаштирилган депортация билан таҳдид қилмоқда, дея таъкидлади агентлик. Унинг маълумотларига кўра, украиналик қочқинларни ҳуқуқий мақомдан маҳрум қилиш режалари Володимир Зеленский ва Доналд Трамп ўртасидаги можародан олдин пайдо бўлган.

Манбаларнинг Reuters агентлигига маълум қилишича, бу АҚШ янги маъмуриятининг собиқ президент Жо Байден даврида бошланган гуманитар бошпана дастурлари доирасида Қўшма Штатларга келган 1,8 миллиондан ортиқ муҳожирнинг ҳуқуқий мақомидан маҳрум қилиш бўйича катта стратегиясининг бир қисмидир.

CBS: АҚШ украинларнинг миграция аризаларини қабул қилишни тўхтатди

19 феврал куни CBS News телеканали Оқ уйнинг икки мулозимига таяниб, Вашингтон АҚШнинг собиқ президенти Жо Байден маъмурияти томонидан амалга оширилган дастурлар бўйича аввалроқ киришга рухсат берилган Украина ва Лотин Америкаси давлатлари фуқароларининг барча иммиграция аризаларини тўхтатиб қўйгани ҳақида хабар берди. Бундай дастурлар қаторида Uniting for Ukraine ҳам бор, унга кўра Россиянинг Украинага кенг кўламли бостириб кириши бошланганидан бери 240 мингга яқин украиналик фуқаролар АҚШга кирган.