ҲАМАС Исроил ҳарбий ҳаракатлар бошласа, гаровга олинганларни ўлдириш билан таҳдид қилди

Ҳаракат фикрига кўра, Исроил «янги ҳужум учун Америка ҳомийлигини таъминлаш мақсадида битимдан қочишга уринмоқда».

Фото: AP

Фаластиннинг ҲАМАС гуруҳи ҳарбий қаноти вакили Абу Убайда 6 март куни видеомурожаатида агар Исроил урушни қайта бошлаган тақдирда, гаровга олинганлар ҳалок бўлишини айтди. Мурожаат, жумладан, гаровга олинганларнинг яқинларига ҳам йўлланган.

«Бизда гаровга олинганларнинг шу кунгача тирик эканлиги ҳақида ҳужжатли далиллар бор. Эртага ёки келажакда бу ўзгариши мумкин. Бу яна уруш бўлишини англатади, улар омон қолмайди. Ҳар қандай кескинлашув гаровдагиларнинг ўлимига олиб келади», деди Абу Убайда.

Унинг қўшимча қилишича, Исроил «янги ҳужум учун Америка ҳомийлигини таъминлаш мақсадида битимдан қочишга уринмоқда». ҲАМАС ва Исроил келишувнинг биринчи босқичи 27 февралда якунланди.

Исроилнинг 9-канали қайд этишича, ҲАМАС томонидан гаровга олинганларнинг қариндошлари ва мухолифатчи исроилликларга босим ўтказишнинг бундай тактикаси биринчи марта қўлланмаяпти. ҲАМАС бошқа нарсалар қатори шанба кунлари ҳукуматга қарши намойишлар олдидан гаровга олинганларнинг видеотасвирларини мунтазам эълон қилади.

Аввалроқ, АҚШ президенти Доналд Трамп ҲАМАС ҳаракатига «охирги огоҳлантириш» бериб, гаровга олинганларнинг барчасини зудлик билан озод қилишни талаб этган эди. Бироқ, ҳамасчилар бу таҳдидни эътиборсиз қолдириб, Исроил билан келишувнинг иккинчи босқичига ўтилмагунча ҳеч ким озод этилмаслигини маълум қилди.

Исроил ва ҲАМАС ўртасида ўт очишни тўхтатиш келишувининг биринчи босқичи 27 февраль куни якунланди. Унда гаровдаги 33 нафар исроиллик 1890 нафар фаластинлик асир эвазига қайтарилди. Исроил армияси маълумотларига кўра, ҲАМАС асирлигида 59 нафар исроиллик қолмоқда, уларнинг ярми ҳалок бўлган деб ҳисобланади.

#АҚШ #Исроил #ҲАМАС