Абдуқодир Ҳусанов – «Манчестер Сити»нинг феврал ойидаги энг яхши ўйинчиси деб эълон қилинди

Ўзбекистон миллий жамоаси ҳимоячиси Абдуқодир Ҳусанов «Манчестер Сити» клубидаги дастлабки ойидаёқ энг яхши футболчи деб топилди.

Фото: Getty images

«Манчестер Сити» клуби матбуот хизмати феврал ойи якунларига кўра, ойнинг энг яхши футболчиси номи учун сўровнома ўтказди. Қувонарлиси, номзодлар рўйхатига Абдуқодир Ҳусанов ҳам киритилган эди ва ўзбекистонлик ҳимоячи «Сити»даги илк ойидаёқ жамоа ҳужумчиси Эрлинг Ҳоланд ва чап қанот ҳимоячиси Йошко Гвардиол билан ой лауреати соврини учун курашди.

Бир ҳафта давомида ўтказилган овоз бериш якунларига биноан, Абдуқодир Ҳусанов – «Манчестер Сити»нинг феврал ойидаги энг яхши ўйинчиси деб топилди. Қайд этиш жоиз, 21 ёшли ҳимоячининг сўровномада ғолиб бўлишида ўзбекистонлик мухлисларнинг овоз бериш жараёнида фаол бўлгани муҳим аҳамият касб этди.

Маълумот учун, Ҳусанов «Сити» сафида феврал ойида АПЛ доирасида 4та, ЕЧЛда битта, Англия кубоги доирасида эса битта ўйин ўтказиб, 1та голга муаллифлик қилди.

Аввалроқ, Ўзбекистон миллий жамоаси ҳужумчиси Элдор Шомуродов ҳам «Рома»даги 4 йиллик фаолияти давомида илк бор Рим клубининг феврал ойидаги энг яхши ўйинчиси деб топилганди.