Путин 2025 йилда миграция сиёсатининг янгиланган концепциясини тезроқ қабул қилишга чақирди

Ҳужжатда меҳнат мигрантлари учун «мослашиш курси» ва мамлакатда ўзини тутиш қоидалари тўғрисидаги эслатма ишлаб чиқиш ва бошқа бандлар бор.

Фото: ТАСС

Россия президенти Владимир Путин Ички ишлар вазирлиги йиғилишида сўзлаган нутқида миграция сиёсатининг янгиланган концепциясини «имкон қадар тезроқ» қабул қилишга чақирди. Унинг сўзларига кўра, буни жорий йилда қилиш керак, деб ёзди «Интерфакс».

Концепциянинг янгиланган варианти миграция картасининг қоғоз шаклидан воз кечишни ўз ичига олиши, шунингдек, ватандошларнинг Россияга қайтишини қўллаб-қувватлаш чоралари ишлаб чиқилиши керак, деб ҳисоблайди президент.

Путин, шунингдек, рус анъанавий қадриятларига эга бўлган ва Россияда яшаш ва ишлашни хоҳлайдиган чет элликларни қўллаб-қувватлаш механизмларини ишлаб чиқиш кераклигини таъкидлади, айниқса улар маълумотли бўлса ва «иқтисодиётга керак бўлса».

Президент Ички ишлар вазирлиги олдида миграция соҳасида «жиддий вазифалар» турганини таъкидлади. «Ноқонуний миграция каналларини тўхтатиш ва миграцияни назорат қилишнинг замонавий воситаларидан фаолроқ фойдаланиш керак», деди у.

Ҳукуматнинг миграция сиёсатини амалга ошириш режаси 2023 йилда ишлаб чиқилган ва жорий йилда якунланади. Ҳужжат олти бўлим ва 42 банддан иборат. Бандлар орасида меҳнат мигрантлари учун «мослашиш курси» ва мамлакатда ўзини тутиш қоидалари тўғрисидаги эслатма ишлаб чиқиш, олий ўқув юртлари ва коллежларда чет эллик талабалар сонини кўпайтириш, хорижликларга бериладиган электрон визалар турлари рўйхатини кенгайтириш кабилар бор.

#Владимир Путин #миграция #Россия