«Бу Зеленскийнинг энг ёмон баёноти» — Трамп Украина президентининг тинчлик битими тўғрисидаги сўзлари ҳақида

АҚШ президенти Доналд Трамп Володимир Зеленскийнинг тинчлик битимига ҳали «жуда, жуда узоқ» экани борасидаги сўзларини Украина президентининг «энг ёмон баёноти», деб атади.

«Бу Зеленский берган энг ёмон баёнотдир ва Америка бунга узоқ вақт чидаб турмайди! Айтганимдек, бу йигит Америка қўллаб-қувватлови бор экан тинчлик бўлишини хоҳламайди, Европа эса Зеленский билан учрашувда тўғридан-тўғри улар бу ишни АҚШсиз қила олмасликларини билдирди — эҳтимол, бу Россияга қарши кучларни намойиш этиш мақсадида қилинган энг яхши баёнот эмасдир. Улар нимани ўйлаяпти?», — деб ёзади Трамп Truth Social ижтимоий тармоғига. 

У ўз постига Associated Press’нинг 3 мартдаги «Зеленский Россия билан уруш тугашига «ҳали жуда, жуда узоқ» эканини маълум қилди», сарлавҳаси остидаги материали ҳаволасини қолдирган. Унда агентлик Зеленскийнинг Украина ва Россия ўртасидаги урушнинг тўхтатилишига «ҳали жуда, жуда узоқ» экани ҳақида айтган гапидан иқтибос келтирган ва у Оқ уйда Доналд Трамп билан юз берган тортишувга қарамай, Америка қўллаб-қувватловини олишни давом этиш ниятида эканини қўшимча қилган.

«Ўйлайманки, АҚШ билан муносабатларимиз давом этади, чунки бу тасодифий муносабатлардан каттароқ нарса», — дея AP Зеленский сўзларини келтиради.

Володимир Зеленский 28 феврал куни Оқ уйда Доналд Трамп ва унинг вице-президенти Жей Ди Вэнс билан учрашди. Музокаралар икки мамлакат етакчиларининг тортишуви билан якунланди. Зеленский Трампнинг сўровига кўра, Оқ уйни муддатидан олдин тарк этди. Томонлар Украинада нодир металларни қазиб олиш бўйича битимни имзоламади. 

Шундан сўнг, Украина президенти Лондонга учиб, бош вазир Кир Стармер билан учрашди. Эртаси куни эса Европа етакчилари иштирокида Украинани қўллаб-қувватлаш масаласига бағишланган саммит бўлиб ўтди. Саммит якунида Стармер Буюк Британия ва Франция Украина билан бирга ўт очишни тўхтатиш режаси устида иш олиб бориши, кейин эса уни АҚШга тақдим этишини маълум қилди.