Россия мигрантларга пойтахт ва унга қўшни ҳудудда битта патент билан ишлашга рухсат беришни режалаштирмоқда

Россияда патентнинг ҳудудий доираси Москва ва Санкт-Петербургда ишлаётган меҳнат мигрантлари учун кенгайтирилиши мумкин. «Россия Федерациясида хорижий фуқароларнинг ҳуқуқий ҳолати тўғрисида»ги қонунга тегишли ўзгартиришлар Россия Молия вазирлиги томонидан тайёрланган.

Қайд қилинишича, пойтахт ва унга қўшни ҳудудларда мигрантлар битта патент бўйича ишлаши мумкинлиги режа қилинмоқда. Ўз навбатида, бир ҳудудда фаолият юритаётган иш берувчи бошқа ҳудудда патент олган хорижий фуқароларни ишга олиш имкониятига эга бўлади. Яъни, Москвада берилган патент билан Москва вилоятида ишлаш мумкин бўлади ва аксинча, Москва вилоятида берилган патент билан Москвада ишлаш мумкин бўлади. Шунингдек, бу Санкт-Петербург ва Ленинград вилоятига ҳам жорий қилинади.

Янги тартиб 2025 йил 1 сентябрдан кучга кириши кутилмоқда.

Мигрантлар учун патент визасиз давлатдан келган чет эл фуқаросига (хусусан, Озарбойжон, Тожикистон, Ўзбекистон, Молдова, яъни ЕОИИ давлатларидан ташқари) Россия ҳудудида ишлашга рухсат берувчи ҳужжатдир. Бугунги кунда патентлар «битта патент - битта минтақа ва битта касб» тамойили асосида берилади.

Хўжалик юритувчи субъектлар кўпинча хорижлик ишчиларга бир вақтнинг ўзида иккита патент бериш заруратига йўлиқмоқда. Шу билан бирга, иккита патент олиш тартиби «хорижий фуқаролар учун катта вақт ва молиявий харажатлар билан боғлиқ», дейилади тушунтириш хатида.

«Федерал қонун лойиҳасининг қабул қилиниши корхоналар учун харажатларни камайтиради ва чет эллик ишчилар билан иш берувчиларга уларнинг меҳнатидан фойдаланган ҳолда маъмурий босимни енгиллаштиради», деб ҳисоблайди Молия вазирлиги. Бошқарманинг ишончи комилки, бу ҳам меҳнат ресурсларининг ҳаракатчанлигини ва чет эл фуқаролари учун патентнинг жозибадорлигини оширади.