Трамп: Украина НАТОга аъзолик масаласини унутиши керак

АҚШ президенти Доналд Трамп Қўшма Штатлар Украинага қўшимча хавфсизлик кафолатларини таклиф қилмаслигини айтди. «Мен ўзимизда мавжуд бўлганидан ортиқ хавфсизлик кафолатларини бермайман. Буни Европага қолдирамиз... Лекин биз, албатта, ҳаммаси яхши бўлишига ишонч ҳосил қиламиз», деди Трамп 26 феврал, чоршанба куни вазирлар маҳкамасининг биринчи йиғилишида. Вашингтон, хусусан, Европа тинчликпарвар кучлари Украинага киритилса, Европани қўллаб-қувватлаши мумкин.

Оқ уй раҳбари Украинадаги урушни тўхтата олишига ишонч билдирди. Унинг айтишича, Россия томони тинчликка эришиш учун музокараларда ён беришга мажбур бўлади. «Биз ҳар икки томон учун ҳам фойдали бўлган келишувга эришиш учун қўлимиздан келганини қиламиз», — деди Америка етакчиси журналистлар билан суҳбат чоғида. Трамп келишув «Украина учун фойдали бўлишини» таъминлашга ҳаракат қилишига ишонтирди. Унинг сўзларига кўра, Қўшма Штатлар Украинага бой берилган ҳудудларнинг бир қисмини қайтариб олишда ёрдам беришга ҳаракат қилади, гарчи бу қийин масаладир.

Бироқ, АҚШ президенти Украина «НАТО ҳақида унутиши» кераклигини таъкидлади. Унинг фикрича, уруш айнан Украинанинг Шимолий Атлантика алянсига аъзолиги масаласи туфайли бошланган.

Трамп Зеленскийнинг Вашингтонга ташрифини тасдиқлади

Трамп Украина президенти Володимир Зеленский 28 феврал куни Вашингтонга «нодир ва бошқа материаллар»ни ўзлаштириш бўйича келишув имзолаш учун боришини тасдиқлади. АҚШ президентининг фикрича, келишув Байден маъмурияти Украинага юборган барча ҳарбий ёрдамни қоплашга ёрдам беради ва шу билан бирга анча кўпроқ фойда келтириши мумкин. Трампнинг таъкидлашича, Қўшма Штатлар Киевга кўрсатган ёрдами учун Вашингтон «келажакда кўп пул» оладиган «келишувга эришди».

Олдинроқ Зеленский Вашингтонда имзоланиши режалаштирилган доиравий келишув ҳақида гапирар экан, унда Украинанинг АҚШга берилган ҳарбий ёрдам учун қарзи ҳақида ҳеч нарса айтилмаганини маълум қилганди. Бундан ташқари, Украина раҳбарининг сўзларига кўра, келишувда «АҚШ ҳукумати Украинанинг узоқ муддатли тинчликка эришиш учун зарур бўлган хавфсизлик кафолатларини олиш борасидаги саъй-ҳаракатларини қўллаб-қувватлаши» қайд этилади.