Довюрак ва фидойи журналист эдинг

Интернет журналистикаси, хусусан Kun.uz сайтида самарали меҳнат қилган иқтидорли, қалами ўткир журналист Алишер Рўзиохунов оғир хасталикдан сўнг, 26 феврал куни 32 ёшида вафот этди. Kun.uz раҳбари Умид Шермуҳамедов муаллифлигидаги некролог.

Алишер ёзиб қолди: “Умид ака, Андижонда “снос” бошланибди, мавзу жуда долзарб, ёняпти… Бугуноқ кечаси йўлга чиқамиз оператор билан, тонг саҳар бориб ишни бошлаймиз, кечга ортга қайтиб, кечаси билан материални монтаж қилиб, тонгда чиқарамиз сайтга”.

Хўп, дедим. Керакли тайёргарликларни кўришди, йўлга чиқишди.

“Етиб келдик, Умид ака. Бошладик ўрганишни…”

Бир неча соат ўтиб: “Даҳшат мавзу, жудаям ёмон ҳолат, тезроқ ўрганиб қайтишга ҳаракат қиламиз”.

“Умид ака, орқамиздан давлат машинаси кузатиб юрибди, тезроқ кўздан ғойиб бўлиб, бор материал билан ортга қайтишга ҳаракат қиламиз”.

Орада, ўша пайтдаги СНБдан (номи негадир қўрқинчли эшитиларди) қўнғироқ бўлди: “Андижондан материал тайёрлаяпсизлар экан. Ўша материал Президент мана бу муҳим хориж сафарига бориб келгунича чиқмасин”. Ўша жиддий оҳангдаги, одатда унчалик тез-тез кузатилмайдиган буйруқ оҳангидаги “топшириқ”.

Йигитлар Андижондан қайтишди, кечаси билан репортаж тайёрлашди, ва мана бу материални эртаси куни чиқаришди. Ўшанда адашмасам биринчи марта СНБнинг жиддий талабини бажармай, улар айтган гапнинг тескарисини қилгандик. Шу сабаб СНБ биздан 3-4 ой “хафа” бўлди, биз билан ишлайдиган ходимни балки четлатишди, балки бошқа ишга олишди, билмайман, лекин шу-шу бизни бир неча ой тинч қўйишди.

Айтмоқчи бўлганим, Алишернинг ўзини хавфга қўйиб бўлса ҳам, долзарб, муҳим мавзуларга чанқоқлиги ва ўзини бу йўлда аямаслиги хотирамда қолган.

Яна бир вазият. Наманганга тадбиркорлар иштирокида репортажлар тайёрлашга кетишди. Бир неча кун кўрсатувлар тайёрлашди ва ортга қайтишди. Бу сафардан бир неча кун ўтиб, наманганлик бир таниш тадбиркор менга телефон қилиб, катта раҳмат айтиб қолди. Сабабини сўрасам, Алишер репортажларни чиройли якунлаганидан сўнг, бир гуруҳ тадбиркорлар миннатдорчилик сифатида конвертда озгина пул бермоқчи бўлишган экан, қилган меҳнати учун. Алишер шу пайт конвертни олмагани, “ойлигимиз яхши, пулни олсак раҳбарият хафа бўлади” деб рад этганини айтиб қолишди. Жуда хурсанд бўлдим. Алишер Тошкентга қайтганидан кейин, ўзимиз миннатдорчилик сифатида ўша олмаган конверти ўрнига ҳалол қилиб қўлига ўзимиз номимиздан топширдик. Жамоа аъзоларига ҳам буни ўрнак қилиб кўрсатдик.

Алишер иқтисодий мавзуларни ёритишда жамоада катта ўринга эга эди. Kun.uz'нинг иқтисодий бўлимини анча кучайтирган, иқтисодиётдаги ўзгаришларни очиб берувчи, одамларнинг молиявий саводхонлигини оширувчи кўп материаллар тайёрлаган, ҳатто ҳукуматнинг иқтисодий блоки раҳбарлари иштирокида “Мунозара клуби”ни ҳам ташкил этганди.

Меҳнатларингга рози бўл, Алишер. Биз сендан розимиз. Жудаям қисқа умринг-ла, жудаям кўп мавзуларни кенг қамровли ўрганиб кетишга улгурдинг. Охиратинг обод бўлсин!

Алишер Рўзиохунов муаллифлигидаги айрим материаллар