Тайван сувости кабелига шикаст етказгани гумонланаётган Хитой кемасини ҳибсга олди

Соҳил хавфсизлик хизмати кабелнинг атайлаб шикастлангани аниқ эмаслигини, бироқ «бу Хитой босими оқибатининг эҳтимоли эканини инкор этиб бўлмаслигини» маълум қилди.

Фото: Financial Times

Тайван қирғоқ қўриқлаш хизмати 25 февраль куни эрталаб Хитойга тегишли юк кемасини оролнинг ғарбий соҳилида сувости алоқа кабелига шикаст етказганликда гумонлаб ҳибсга олди, деб ёзди Financial Times.

Бу Тайван ҳукумати Хитойнинг «махфий флоти»га қарши кампания бошлаганидан бери биринчи шундай ҳодисадир. Соҳил хавфсизлик хизмати кабелнинг атайлаб шикастлангани аниқ эмаслигини, бироқ «бу Хитой босими оқибатининг эҳтимоли эканини инкор этиб бўлмаслигини» маълум қилди.

Ушбу маълумотларга кўра, ҳисбга олинган «Hong Tai 168» кемаси Того байроғи остида сузиб юрган. Қўлга олинган пайтда Тайнан шаҳри яқинида, Пенгҳу архипелагини Тайван материкига боғлайдиган кабелдан бир километр шимолда бўлган. Кема ҳудудни тарк этиши буюрилган кетма-кет еттита радио хабарига жавоб бермаган. Шундан сўнг, қирғоқ қўриқчилари кема юборган ва «Hong Tai 168» лангар ташлаганини аниқлаган.

Бу сўнгги ойларда Хитой ёки Россия юк кемалари, жумладан Болтиқ денгизида иштирок этгани тахмин қилинаётган сувости кабелининг шикастланиши билан боғлиқ энг сўнгги ҳодисадир. Ўтган йилнинг ноябрь ойида Хитойнинг юк ташувчи кемаси Болтиқ денгизидаги иккита интернет кабелини шикастланган вақтда устидан сузиб ўтган. Октябрь ойида эса Ҳонконгда рўйхатдан ўтган контейнер кемаси ўша ҳудуддаги шикастланган газ қувури ва кабели ёнида топилган эди. Январь ойи бошида Хитойга тегишли яна бир кема Тайваннинг шимолий қирғоғи яқинида бу ҳудудда қайта-қайта пайдо бўлганидан кейин Транс-Тинч океани кабелига зарар етказганликда гумон қилинган эди.

#Тайван #Хитой #сувости кабели