Тошкентда мижозининг юзига жароҳат етказган косметолог жиноий жазога тортилди

Чилонзор туманидаги аёллар салонида косметолог бўлиб ишловчи аёл мижозининг юзига жароҳат етказиб қўйди. Суд уни айбли деб топиб, жиноий жазо қўллади.

Kun.uz ўрганган суд ҳужжатида келтирилишича, косметолог У.Х. тиббиёт соҳасида жарроҳлик амалиётини ўтказиш бўйича Соғлиқни сақлаш вазирлигидан тегишли рухсатнома олмаган ҳолда 2023 йил сентябр ойида мижози, 1979 йилда туғилган Н.Қ.ни операция қилган. У мижозининг юз соҳасини торайтириш мақсадида унинг пешонасидан қулоғи ёнигача скалпел ёрдамида кесган.  

У.Х. судда айбига тўлиқ иқрорлик билдирган.

“Мижоз юзини тортиб қўйишимни сўраб мурожаат қилди. Унга операция қилиш бўйича рухсатномам йўқлигини айтсам ҳам илтимос қилаверди. Шунга кўндим.

Операцияни бошладим ва бир маротаба ишлатиладиган скалпел билан мижознинг юз соҳасини кесиб, яъни пешона соҳасидан қулоқ остигача кесган ҳолда ортиқча осилган терини олиб ташладим. Сўнгра кесган жойимни бир маротаба ишлатиладиган игна ва ип билан тикиб қўйдим.

Мижоз раҳмат айтиб чиқиб кетди. У 10 кун давомида тиббий муолажага қатнаб туриши керак эди. Эртасига телефон қилиб, тиббий муолажа олишга келишини айтганимда у вилоятга тўйга кетганини, тўйдан кейин келишини билдирди. Шундан кейин у менга ўзи ишлаб келаётган тиббий клиникада юз соҳасидаги ипларни олдириб ташлаганини, юзида оғриқлар йўқлигини, ҳаммаси жойида эканини айтди.

Орадан 5-6 ой муддат ўтиб, яъни 2024 йилнинг феврал ойларида мижоз юзида чандиқ излари қолганини айтиб, даъво қила бошлади”, деган косметолог ўз кўрсатмасида.

У.Х. мижоз аёл ундан 2 минг доллар сўраганини, бунча пули йўқлигини айтганидан сўнг ИИБга ариза билан мурожаат қилганини, сўнгра унга 500 доллар берганини таъкидлаган. 

Жабрланувчи Н.Қ. эса косметологдан пластик жарроҳлик амалиётини ўтказишга рухсатномаси бор ёки йўқлигини сўраганида у бор деб айтганини маълум қилган.

“Бундай ишларни кўп қилганини айтиб, мени ишонтирди. Орадан 3 ой ўтиб, юзимдаги тери қопламаси кесилган жойларидан ортиқча гўшт ўсиб чиқди. Бу ҳақда судланувчига айтганимда у энди ҳеч нарса қилиб бера олмаслигини билдирди. Сўнгра ИИБга мурожаат қилдим.

Етказилган жароҳат оқибатларини бартараф қилиш учун қайта жарроҳлик амалиётини ўтказдим. Бу учун 11 млн сўм сарфладим. Судланувчи 500 доллар берганини инобатга олиб, қолган суммани ундан ундириб беришни сўрайман”, деган жабрланувчи.

Жиноят ишлари бўйича Чилонзор туман судининг 2025 йил 20 февралдаги ҳукмига кўра, косметолог У.Х. Жиноят кодексининг 111-моддаси (эҳтиётсизлик орқасидан баданга ўртача оғир ёки оғир шикаст етказиш) 2-қисми билан айбли деб топилган. Унга Жиноят кодексининг 57-моддасини қўллаган ҳолда БҲМнинг 10 баравари миқдорида жарима жазоси тайинланган.