Испания ва Миср Ғазо секторидаги фаластинликларнинг кўчирилишига қарши чиқди

Испания бош вазири Педро Санчес АҚШ президенти Доналд Трампнинг Ғазо сектори аҳолисини анклав ҳудудидан кўчириш тўғрисидаги ташаббусини рад этди. Миср президенти Абдулфаттоҳ ас-Сисий билан ўтказилган қўшма матбуот анжуманида у бундай режа халқаро ҳуқуққа зид эканини маълум қилди.

Шунингдек, Санчес Испания Фаластинда иккита давлат тузиш тўғрисидаги режанинг амалга оширилишига содиқлигини тасдиқлади.

Ас-Сиси Испания бош вазирига мазкур позицияси учун миннатдорчилик билдирди. Унинг қўшимча қилишича, Исроилда тақиқланган БМТнинг фаластинлик қочқинлар бўйича агентлиги фаластинликларга ёрдам кўрсатишда муҳим рол ўйнайди.

Абдулфаттоҳ ас-Сисий ва Педро Санчес, шунингдек, Миср ва Испания ўртасидаги стратегик шериклик тўғрисидаги декларацияни ҳамда турли соҳаларда бир қатор англашув меморандумларини имзолади.

Феврал бошларида Трамп Исроил АҚШга Ғазо секторини топширишини, унинг аҳолиси эса Миср ва Иорданияга кўчирилишини маълум қилганди. «АҚШ Ғазо устидан назоратни қўлга олади. Биз унга эгалик қиламиз ва у ерда портламай қолган хавфли бомбалар ҳамда қуролларни йўқ қилиш, вайрон бўлган биноларни бутунлай бузиб, текислаб ташлаш масъулиятини ҳам ўз зиммамизга оламиз. Биз у ерда иқтисодий тараққиёт ва саноқсиз иш жойлари, минтақа одамлари яшашлари учун турар-жой барпо этамиз», деганди Трамп.

АҚШ президентининг режаси кўплаб давлатлар ва ташкилотларнинг раҳбарлари танқидига учради. Инсон ҳуқуқлари бўйича БМТ кенгаши томонидан тузилган мустақил комиссия раиси Нави Пиллей Трамп «халқаро ҳуқуқдан ачинарли даражада бехабар» эканини маълум қилди. Араб давлатлари лигаси раҳбари Аҳмад Абдул Гейт эса Ғазо секторидаги фаластинликларнинг кўчирилишини «қабул қилиб бўлмаслигини» айтди.