АҚШнинг 14 штати Трамп ва Илон Маскни судга берди

Даъвогарларнинг таъкидлашича, Маскнинг DOGE директори этиб тайинланиши «Конституцияга зид».

Фото: AFP

АҚШ 14 штати миллиардер Илон Маск ва президент Доналд Трампни судга берди. Даъвогарлар Маскнинг Ҳукумат самарадорлиги департаменти (DOGE) директори лавозимига тайинланишини «Конституцияга зид» деб ҳисобламоқда.

Илон Маскнинг ҳукумат институтларига таъсири Қўшма Штатларда мунозаралар мавзуси бўлиб қолмоқда.

Американинг The Hill нашри хабарига кўра, Ню-Мексико, Аризона, Мичиган, Калифорния, Коннектикут, Ҳавайи, Мэриленд, Массачусетс, Миннесота, Невада, Орегон, Род-Айленд, Вермонт ва Вашингтон штатлари Трамп, Маск ва DOGE устидан судга мурожаат қилган.

Мурожаатда Маскнинг DOGE директори этиб тайинланиши «Конституцияга зид» экани айтилади ва унга берилган ваколатлар «чексиз ва назоратсиз ҳокимият» деб аталади.

«Президент Трамп миллат учун юзага келиши мумкин бўлган таҳдидни етарлича баҳоламаяпти. Трамп жаноб Маскка Конгресснинг тегишли рухсатисиз ёки унинг фаолияти устидан оқилона назоратсиз деярли чексиз ваколат берган», дейилади ҳужжатда.

Шу билан бирга, Маск сўнгги пайтларда Трампга қарши судга берилган даъволар ҳақидаги фикрини айтди.

«Қаерда судья президентнинг ҳар қандай ҳаракатини хотиржамлик билан тўхтата олса, демак, биз демократик давлатда яшамаяпмиз», деди миллиардер.

DOGE ташкилоти АҚШ президенти Доналд Трамп томонидан «федерал маблағлар исроф қилинишининг олдини олиш» мақсадида ташкил этилган.

#АҚШ #Илон Маск #Доналд Трамп #DOGE