Bloomberg Россия — Украина уруши тугашининг эҳтимолий учта сценарийсини тузди

Bloomberg таҳлилчилари Россия-Украина уруши тугашининг учта эҳтимолий сценарийсини тасвирлаб беришди. Сценарийлар агентликнинг АҚШ президенти Доналд Трампнинг Владимир Путин билан телефон орқали мулоқотига, шунингдек, бу ҳақда огоҳлантирилмаган европалик расмийларнинг ушбу мулоқотга муносабатига бағишланган мақоласида келтирилган.

Трампдаги юқори ишончга қарамай, тинчлик келишувига эришиш мумкинми ёки йўқми, ҳозирча номаълум, чунки Путин ҳали ҳам «муросага мойиллик кўрсатмаяпти», деб ёзади Bloomberg. Бироқ, агентликдагилар фикрича, Украинадаги можарони ҳал этишнинг «кенг контурлари» аллақачон кўриниб турибди. Таҳлилчилар уларни қуйидагича тақдим этишади:

Асосий (эҳтимоли юқори) сценарий: Украинанинг Россия томонидан аннексия қилинган ҳудудлари яқин келажакда «муаллақ ҳолатда» ва амалда Россия назорати остида қолади. Айрим ҳудудлар, хусусан, Курск областининг Украина қуролли кучлари томонидан ишғол этилган ҳудудлари билан боғлиқ алмашувлар истисно қилинмайди. Украина маълум даражада хавфсизлик кафолатларини қўлга киритади, музокараларнинг асосий қисми эса ушбу кафолатларнинг қанчалик кучли бўлишига қаратилади. Украинанинг НАТОга қўшилиши ҳозирча истисно қилинаётгани сабабли, ушбу кафолатлар бўйича мажбуриятлар бажарилиши бўлажак сиёсий раҳбарлар қарорларига боғлиқ бўлади. Агар Европа Оқ уй билан яхши алоқа ўрнатишга муваффақ бўлса, АҚШни Украинани қўллаб-қувватлашни давом эттиришга ишонтириши мумкин, бу вақтда Европа Иттифоқи мамлакатлари бу йўналишда ўз имкониятларини кенгайтиради.

Энг яхши (Киев учун идеал) сценарий: Россия тинчлик битими шартларини бузган тақдирда вазиятга АҚШ ва Европа мамлакатлари аралашиши ваъда қилинади. Бироқ Россия билан тўғридан тўғри тўқнашув хавфи ҳатто Украинанинг энг қатъий тарафдорларида ҳам ташвиш уйғотмоқда, дея қайд этади Bloomberg. Бунинг ўрнига, Киевнинг иттифоқчилари Украинага ҳарбий ёрдамни кучайтириш, Россияга қарши санкцияларни қайта жорий этиш ёки кучайтириш, Украина мудофаа саноатини ривожлантиришга ва Украина қуролли кучларини ислоҳ қилишга кўмаклашишга ваъда бериши мумкин. Воқеалар ривожининг бундай варианти Украина 10 йил ичида Европа Иттифоқига аъзо бўлишига йўл очиши мумкин, бу эса ўз навбатида Европа Иттифоқининг шарқий қанотини мустаҳкамлашга имкон беради.

Энг ёмон (ва Киев учун «даҳшатли») сценарий: Трамп ҳеч қандай келишувга эришмасдан Украинанинг келажагига қизиқишини йўқотиши, ҳарбий ва молиявий ёрдамни тўхтатиши, барча муаммоларни Европа зиммасига ташлаб қўйиши мумкин.

• АҚШ президенти Доналд Трамп бир неча марта Россия ва Украина ўртасидаги урушни имкон қадар тезроқ тугатмоқчи эканини айтган. АҚШ ҳозирга қадар можарони якунлаш бўйича расмий режани тақдим этмади.
• Пентагон раҳбари Пит Ҳегсет 12 феврал куни Брюсселда сўзлаган нутқида Украина иттифоқчиларини мамлакатни 2014 йилгача бўлган чегараларга қайтариш — «хаёлий мақсад» эканини тан олишга чақирди. У, шунингдек, расмий Киев талаб қилаётган Украинанинг НАТОга аъзолиги масаласида АҚШнинг позициясини маълум қилди. Ҳегсетнинг сўзларига кўра, АҚШ буни «можарони музокаралар йўли билан ҳал қилишнинг реал натижаси» деб ҳисобламайди. «Бунинг ўрнига ҳар қандай хавфсизлик кафолати Европанинг ва Европаники бўлмаган жанговар қўшинлар билан мустаҳкамланиши керак», — деди АҚШ мудофаа вазири.
• Шу куни АҚШ президенти Доналд Трамп Владимир Путин билан, кейин эса Украина президенти Володимир Зеленский билан қўнғироқлашди. Шундан кейин Трамп Россия-Украина урушини якунлаш бўйича музокаралар бошланишини эълон қилди.