Украина мудофаа вазири Россия билан музокараларга тайёрлигини маълум қилди

Украина Россия билан музокараларга тайёр. Бу ҳақда мамлакат мудофаа вазири Рустем Умеров маълум қилди.

Шу билан бирга у «адолатли ва мустаҳкам тинчлик» фақатгина ўз мамлакати «жанг майдонида кучли бўлса»гина ўрнатилиши мумкинлигини таъкидлади.

Умеров Брюсселда Украина бўйича Алоқа гуруҳининг «Рамштайн» форматида ўтказилаётган йиғилишида иштирок этмоқда. «Мудофаамиз ва бутун Европа хавфсизлигини мустаҳкамлаш устида иш олиб бормоқдамиз», — дейди у. Йиғилишга илк бор Буюк Британиянинг мудофаа масалалари бўйича давлат котиби Жон Хили бошчилик қилмоқда. Шунингдек, унда Пентагоннинг янги раҳбари Пит Хегсет ҳам иштирок этяпти.

Аввалроқ Россия президенти Владимир Путин Москва Украина президенти Володимир Зеленский билан музокаралар ўтказишга тайёр эканини, аммо уни якуний тинчлик битимини имзолаши мумкин бўлган легитим президент дея ҳисобламаслигини маълум қилганди. Кўп ўтмай Кремл матбуот котиби Дмитрий Песков Путин Украина президентини «нолегитим» дея ҳисобласа ҳам, Россия Зеленский билан музокаралар ўтказишдан бош тортмаслигини билдирди.

Ўз навбатида Зеленский урушни тугатиш учун Путин билан тўғридан тўғри музокаралар ўтказишга тайёрлигини айтди. «Агар бу украинлар учун тинчликка эришиш ва одамларни йўқотмаслик йўлида ягона конфигурация бўлса, албатта, биз бунга борамиз», — деди Украина президенти.

Кейинроқ Зеленский Киев Москвага Курск вилоятидаги босиб олинган ерларни қайтариб, ҳудудий алмашинувни таклиф қилиши мумкинлиги ҳақида гапирди. Кремл бундай вариантни «имконсиз» деб атаб, ҳар қандай савдолашиш ноўрин экани ва бу муҳокама ҳам қилинмаётганини таъкидлади. «Украина бўлинмаларининг яксон қилинмаган қисми ушбу ҳудуддан қувиб чиқарилади», — деди РФ президентининг матбуот котиби Дмитрий Песков.