Тошкент вилоятида хотинини ўлдиришда гумонланаётган эр ушланди

Оилавий жанжал оқибатида аёл отасининг уйига кетиб қолган. Кейин эри уни қайтариб олиб кетган. Шундан сўнг, аёлнинг жасади топилган.

Фото: Видеодан кадр

Тошкент вилоятида хотинини ўлдиришда гумонланаётган эр қўлга олинди. Бу ҳақда «Миллар» теледастурида хабар берилди.

Қайд қилинишича, 28 ёшли аёл ўлимидан 10 кун олдин жанжаллар туфайли ота уйига қайтиб кетган. 8 февраль куни тунда 32 ёшли эр аёлнинг ота-онаси уйига бориб, уни машинасида олиб кетган.

Шундан сўнг, аёлнинг жасади Олмалиқ шаҳри ҳудудидан топилган. Эр қотилликда гумонланиб қўлга олинган.

Бош прокуратура хабарига кўра, ҳолат юзасидан Жиноят кодексининг 97-моддаси (Қасддан одам ўлдириш) билан жиноят иши қўзғатилган. Гумонланувчи процессуал тартибда ушланган, тергов бошланган.

#Тошкент #қотиллик #Олмалиқ