Трамп кейинги ҳафта Зеленский билан учрашиши мумкинлигини айтди

Трамп кейинги ҳафта Зеленский билан учрашмоқчи эканини маълум қилди. Бу ҳақда у Япония бош вазири Сигэру Исиба билан биргаликда Оқ уйда ўтказилган брифингда гапирди.

Трампнинг сўзларига кўра, учрашув Вашингтонда ўтказилиши мумкин. «Мен у ерга [Киевга] бормайман», — деди у.

АҚШ ва Украина етакчилари урушда Украинани қўллаб-қувватлаш эвазига нодир медаллар етказиб берилишини муҳокама қилади. «Биз президент Зеленский билан кўриб чиқадиган масалалардан бири — бу уларнинг активлари хавфсизлигини таъминлаш. Уларда ерости активлари бор… Аслида барчамиз хавфсизликни истаймиз, чунки биласизки, Европа биздан кўра камроқ маблағ сарфламоқда», — дейди Трамп.

Шунингдек, Трамп Путин билан ҳам урушни муҳокама қилмоқчи эканини таъкидлаган. АҚШ президенти эҳтимолий учрашувларининг аниқ санасини айтмаган.

У ҳар икки томондан «миллионлаб одамлар» ҳалок бўлаётган уруш тезроқ тугашини хоҳлашини қўшимча қилган. Унинг сўзларига кўра, 800 ёки 900 минг россиялик аскар ҳалок бўлган ёки оғир яраланган, Украина томонида ҳам «худди шунча» — Трамп уларнинг йўқотишини 700 минг киши дея баҳолади. «Улар бироз камроқ кўрсатди, аммо бу нотўғри деб ҳисоблайман», — дейди АҚШ президенти.