НАТО давлатлари ортидан айғоқчилик қилган Россия кемаси бортида ёнғин чиқди

Россиянинг «Килдин» резведка кемаси 23 январ куни Сурия соҳиллари яқинида кутилмаган фавқулодда ҳолатга дуч келди: ёнғин бошланиб, кема бошқарувни йўқотди, деб хабар беради Associated Press.

Қайд этилишича, агентлик қўлга киритган маълумотлар НАТОга аъзо давлатлардан бирининг ҳарбийлари томонидан тақдим этилган. Шу билан бирга, Россия расмийлари Қора денгиз флоти разведка кемаси бортида кузатилган муаммолар тўғрисида хабар бермаган. Таъкидланишича, «Килдин» Шимолий Атлантика альянси кемаси томонидан берилган ёрдам таклифини рад этган. AP манбаларига кўра, Россия кемаси ёнғин вақтида НАТО аъзоси ҳисобланувчи Туркия Ҳарбий-денгиз кучлари ўқувини кузатиш билан шуғулланган.

Ёнғин қандай сабабга кўра юзага келгани номаълум. Қайд этилишича, жамоа тўрт соат давомида оловга қарши курашган ва ҳатто қутқарув қайиқларида эвакуацияга ҳам тайёрланган, аммо охир-оқибат ёнғин ўчирилган. AP қўлга киритган аудиоларда айтилишича, «Килдин» экипажи кема бошқарувини йўқотган. Шу боис кема «Милла Мун» юк ташувчи кемасидан (Того байроғи остида сузувчи) тўқнашувдан қочиш учун йўналишни ўзгартиришни сўраган. Кема берилган сўровни бажарган.

Агентлик суҳбатдошларининг сўзларига кўра, экипаж кема назоратини қайта қўлга киритишга муваффақ бўлган ва ҳозирда «Килдин» Суриядаги Тартус порти яқида разведка вазифаларини бажармоқда. Унга номи ошкор этилмаган фрегат ва таъминот кемаси ҳамроҳлик қилмоқда.

Кремль матбуот котиби Дмитрий Песков Associated Press сўровига жавоб берар экан, мазкур воқеа бўйича маълумотга эга эмаслигини билдирган. Шунингдек, у битта ҳолат орқали Россия ҳарбий-денгиз флотининг аҳволи ҳақида хулосалар чиқариб бўлмаслигини таъкидлаган. Россия Мудофаа вазирлиги вазиятга расмий изоҳ бермаган.

Аввалроқ Буюк Британия мудофаа вазири Жон Ҳили Россиянинг «Янтар» океанографик кемаси Британия ҳудудий сувларига кирганини маълум қилганди.

BBC мақоласида «Янтар» «айғоқчи кема» дея таърифланган. Ҳилининг маълум қилишича, ушбу воқеа — «кучайиб бораётган Россия босқинига» яна бир мисолдир. «Президент Путин бу хабарни эшитишини истайман: биз сизларни кўрдик, нима қилаётганингизни биламиз ва мамлакатимизни ҳимоя қилиш учун қатъий чоралар кўришдан қочмаймиз», — дейди мудофаа вазири.