“АҚШ урушни тугатиш учун Россияга санкцияларни кучайтиришга тайёр” — Кит Келлог

Доналд Трампнинг махсус вакили Кит Келлог АҚШ Украинадаги урушни тўхтатиш учун Россияга қарши санкциялар босимини оширишга тайёр эканини маълум қилди, деб хабар беради The New York Post.

Келлог ҳозирга қадар РФга нисбатан қўлланган чекловларни «10 балли шкалада учга» баҳолади. Унинг ҳисоблашича, Россия нефтини қазиб олиш ва экспортига нисбатан санкциялар кучайтирилиши мумкин.

Унинг таъкидлашича, урушни тезроқ тўхтатиш учун Россияга нафақат иқтисодий, балки ҳарбий ва дипломатик босим ҳам ўтказиш зарур.

Келлогнинг фикрича, мазкур босқичда РФ ҳукумати жанговар ҳаракатларни тўхтатишни унчалик ҳам хоҳламаяпти. Улар улкан йўқотишлардан қўрқмаяпти.

«Улар бунга кўникиб қолган. Мен Сталинград жангида киприк қоқмай 700 минг кишини йўқотишга тайёр бўлган ва йўқотган мамлакатни назарда тутмоқдаман», — дейди Келлог.

Украина ва Россия бўйича махсус вакил Трамп Украинадаги жанговар ҳаракатларни тўхтатиш йўлини топишига ишонч билдирди. «Агар кимдир таъсир кўрсатиш йўлини тушунса, бу президент Доналд Трамп ва сиз буни яқинда қилган ишларидан кўришингиз мумкин [бошқа ташқи сиёсий масалаларни ҳал этишдаги қарорлари]», — дейди у.

Келлогнинг ҳисоблашича, олдинги президент маъмурияти Украинага «қанча керак бўлса шунча» ёрдам беришни ваъда қилган, бироқ босимни кучайтирмаган ва қуролланишни керакли вақтда тақдим этмаган. «Бу стратегия эмас, балки бампердаги ёрлиқ», — дея Келлог Жо Байден давридаги Оқ уй ҳаракатини тасвирлайди.

Аввалроқ Кит Келлог ОАВ хабарларидан фарқли ўлароқ, келаси ҳафта Мюнхен халқаро хавфсизлик конференциясида Доналд Трампнинг Россиянинг Украинага қарши урушини тугатиш режасини тақдим этмаслигини айтганди.