Қўшимча функционаллар
-
Тунги кўриниш
АҚШда ит уриштириш билан шуғулланиб келган шахс 475 йилга қамалди
Курерлардан бири Атлантадаги уйлардан бирига борганида занжирбанд итларни пайқаган ва полицияга хабар берган. Ҳуқуқ-тартибот органлари ушбу уйда тинтув ўтказиб, 107 та питбулни аниқлаган.
Фото: Paulding County Sheriff
Американинг Жоржия штатида яшовчи Винсент Баррелл итларни уриштириш билан шуғуллангани ва ҳайвонларга шафқатсизларча муносабатда бўлгани учун 475 йилга озодликдан маҳрум этилди, деб хабар беради NBC News.
Ҳайвонларга қарши жиноятлар бўйича давлат прокурори Жессика Рок бу ит уриштириш билан боғлиқ белгиланган энг узоқ қамоқ муддати ҳисобланишини маълум қилди.
Жиноят иши 2022 йилда қўзғатилган. Ўшанда курер полицияга ўзи буюртмани етказиб берган Атланта яқинидаги уйларнинг бирида бир қанча итлар занжирбанд сақланаётганини маълум қилган. Шундан кейин полиция ходимлари тинтув ўтказган ва 107 та питбулни аниқлаган. Прокуратурага кўра, итларнинг айримлари жуда озиб кетган.
Винсент Баррелл тинтув куниёқ ҳибсга олинган. Полиция питбуллар ит жангларига юборилганини исботловчи далилларни топган. Жониворларнинг барчаси ҳайвонларга ёрдам кўрсатиш жамғармасига топширилган. Ветеринарлар итларнинг айримларида жангдан қолган чандиқлар борлиги ва тишларининг баъзилари олиб ташланганини тасдиқлаган.
АҚШ Олий суди Винсент Барреллни суд ҳайъати қарори асосида 475 йил муддатга озодликдан маҳрум этди. Баррелл ит жангларини ташкил этиш бўйича 93 та ҳамда ҳайвонларга нисбатан шафқатсиз муносабатда бўлганлик учун 10 та банд бўйича айбдор деб топилган.
