Венгрия Европа Иттифоқининг Россияга қарши санкцияларига шубҳа билан қараяпти

Венгрия ЕИнинг Россияга қарши сўнгги санкциялар пакетига шубҳа билан қараяпти ва бунга розилигини АҚШ билан маслаҳатлашувларга боғлиқ қилиб қўймоқда. Венгрия Европа Иттифоқи вазири Янош Бока 2 феврал, якшанба куни чоп этилган Welt am Sonntag газетасига берган интервюсида: «Россияга қарши кейинги санкцияларни қабул қилишда жуда эҳтиёт бўлишимиз керак», деди.

Россияга қарши янги чеклов чоралари тўғрисида қарор қабул қилишдан олдин Европа Иттифоқи давлатлари президент Доналд Трампнинг янги маъмурияти билан «маслаҳатлашиши керак», деб ҳисоблайди венгер сиёсатчиси. Боканинг сўзларига кўра, ЕИ биринчи навбатда Вашингтон билан янги санкциялар пакетининг мазмунини келишиб олиши керак. Бундай мувофиқлаштиришсиз Венгрия ҳукумати «кейинчалик санкциялар бўйича қарорлар қабул қилиш учун ҳеч қандай асос кўрмайди», деди Венгрия бош вазири Виктор Орбаннинг ишончли вакили ҳисобланган вазир.

Бока, шунингдек, Россияга қарши санкцияларни шубҳа остига олди. Унинг фикрича, ҳозир бу масала бўйича «фундаментал мунозара» вақти. Вазирнинг сўзларига кўра, Венгрия «ҳар қандай ҳолатда ҳам Россияга қарши бундай санкцияларнинг маъноси ва фойдаси бўйича шубҳага эга», чунки «улар кўпчилик кутганидан бутунлай бошқача кўринади». Бундан ташқари, «санкциялар абадий давом этиши мумкин эмас ва шунинг учун биз Европа иқтисодиёти ва рақобатбардошлигини заифлаштиришда давом этамиз, масалан, энергия нархларини ошириш орқали».

16-санкция пакетини тайёрлаш

29 январ куни Европа комиссияси аъзо давлатларга Россияга қарши 16-санкция пакети бўйича таклифни тақдим этди. Ушбу масалани муҳокама қилиш чоғида Европа Иттифоқининг 27 давлати Россия алюминийсининг импортига тақиқ жорий этиш имкониятини кўриб чиқмоқда.

Дипломатларнинг сўзларига кўра, санкциялар рўйхатига алюминийдан ташқари, Россия нефтини Ғарб давлатлари томонидан белгиланган баррел учун 60 доллардан юқори нархда ташиш билан шуғулланувчи «соядаги флот» деб аталадиган яна 73 та танкер ҳам киритилиши режалаштирилган.

Шунингдек, Европа Иттифоқи Россиянинг яна 15 га яқин банкини SWIFT халқаро банк тизимидан узишни таклиф қилди, деб хабар берди Bloomberg манбаларга таяниб.

Бундан ташқари, янги санкциялар пакети доирасида ЕИ Россияга ўйин приставкаларини экспорт қилишни ҳам тақиқлаши мумкин. Расмийларнинг фикрича, Москва консоллардаги аппарат таъминоти воситаларидан фойдаланмоқда, масалан, Украинага дрон ҳужумларини йўналтириш учун.

Янги санкциялар пакетини маъқуллаш учун Европа Иттифоқига аъзо барча давлатларнинг розилиги талаб қилинади ва Венгриянинг қаршилигини ҳисобга олган ҳолда, бу чоралар маъқулланиши даргумон. Россиянинг Украинага бостириб киришининг 3 йиллиги арафасида Россияга нисбатан жазо чораларининг янги кучайтирилиши муҳокама қилинмоқда.