АҚШ президенти Европа Иттифоқига божлар киритиш билан таҳдид қилмоқда

Доналд Трамп АҚШ ва Европа Иттифоқи ўртасидаги савдо камомадидан норози. Вашингтон аллақачон Канада, Хитой ва Мексика маҳсулотларига божлар жорий қилган ва бу Брюсселнинг танқидига сабаб бўлган.

Фото: Evan Vucci, AP

АҚШ президенти Доналд Трамп тез орада Европа Иттифоқидан импорт қилинадиган товарларга божлар жорий этиш ниятида. Оқ уй раҳбари 2 феврал, якшанба куни: «Менда вақт жадвали йўқ, лекин бу жуда тез содир бўлади», деди.

Европа Иттифоқи «биздан фойдаланди», деб шикоят қилди республикачи. Трампнинг сўзларига кўра, Қўшма Штатларнинг ЕИ билан савдо камомади 300 миллиард долларга (293 миллиард евро) етган. Атлантика океанининг нариги томонидаги ҳамкор АҚШдан ҳеч қандай машина ёки қишлоқ хўжалиги маҳсулотларини олиб кетмайди, Қўшма Штатлар эса «ҳамма нарсани олади», деб тушунтирди Оқ уй раҳбари.

АҚШнинг Канада, Хитой ва Мексикадан товарларга божлари

Бундан бир кун аввал Трамп Канада, Хитой ва Мексикадан маҳсулотларга божлар жорий қилган эди. Қўшма Штатларга қўшни Канада ва Мексика товарлари учун ставка 25 фоизгача бўлади, Канада энергия ресурслари учун ставка эса 10 фоиз қилиб белгиланган. Худди шу ўн фоизлик ставка Хитойдан келган товарларга нисбатан қўлланилади.

Бу ҳаракат нафақат Оттава, Пекин ва Мехикода танқидга учради. Қўшма Штатлардаги қатор касаба уюшмалари Вашингтон позициясини қоралади.

Европа Иттифоқи Трампнинг қароридан афсусда эканлигини билдирди ва Брюссел ноҳақ ёки ўзбошимчалик билан тарифларни жорий қилган ҳар қандай савдо шеригига «қатъий жавоб бериши» ҳақида огоҳлантирди. Европа Комиссияси раиси Урсула фон дер Ляйен январ ойида Оқ уйни Европа билан савдо урушини бошламаслик ҳақида огоҳлантирган, аммо музокаралар олиб боришга тайёрлигини билдирган.

#АҚШ #Европа Иттифоқи