Қишлоқ хўжалиги вазирлиги Қозоғистон чегарасида ушлаб турилган картошкалар юзасидан маълумот берди

Қозоғистон божхонаси юкни фитосанитар текширувдан ўтказиш учун 10 кундан ортиқ ушлаб тургани, натижада картошкалар чириб кетгани тўғрисида хабар берилганди. Ўзбекистон Қишлоқ хўжалиги вазирлигининг маълум қилишича, чегарада мазкур юкларни атайлаб ёки сунъий равишда ушлаб туриш ҳолати мавжуд эмас.

Қайд этилишича, ўзбекистонлик бир нечта тадбиркорлик субъектларига тегишли картошка ортилган вагонлар фитосанитар назорат тартибига мувофиқ Қозоғистон—Ўзбекистон чегарасининг Қозоғистон ҳудудида вақтинча тўхтатилган. Ушбу текширув жараёнида юк ҳужжатларида аниқланган айрим техник камчиликлар сабабли маҳсулотни чегарада қисқа муддат ушлаб туриш эҳтиёжи вужудга келган. Мазкур техник муаммолар ўрнатилган тартибда тўлиқ бартараф этилган.

«Қозоғистон чегарасида мазкур юкларни атайлаб ёки сунъий равишда ушлаб туриш ҳолати мавжуд эмас. Икки мамлакат қишлоқ хўжалиги вазирликларининг ҳамкорликдаги саъй-ҳаракатлари натижасида маҳсулот айни кунда Тошкент шаҳридаги Чуқурсой сақлаш пунктига етказилди», — дейилади Қишлоқ хўжалиги вазирлиги муносабатида.

Таъкидланишича, ҳозирда тадбиркорлик субъектларига тегишли барча картошка маҳсулотлари сотув расталарига йўналтирилмоқда. «Бу эса картошка нархи билан боғлиқ вазиятни бартараф этиш ва бозорларда мазкур маҳсулотга бўлган нархнинг барқарорлашувига хизмат қилади», — дея таъкидланади хабарда.

Қишлоқ хўжалиги вазирлиги аҳолини сифатли ва арзон маҳсулотлар билан таъминлаш мақсадида чегаралардаги фитосанитар ва логистика жараёнларини доимий назоратда тутишини ҳам эслатиб ўтган. Келгусида бундай техник камчиликларнинг такрорланмаслигини таъминлаш юзасидан тегишли чора-тадбирлар кўрилиши айтилди.