Қозоғистоннинг 43 вагон картошкаси Ўзбекистон чегарасида чириб кетгани маълум бўлди

Қозоғистоннинг Павлодар шаҳридан жўнатилган картошка Ўзбекистон билан чегарада қўлга олинди, деб хабар берди Tengrinews.

Қайд қилинишича, Сариоғоч станциясида 43 та вагонга юкланган картошка турибди. Январ ойида маҳаллий тадбиркорлар уни Ўзбекистонга сотган ва юк поезди орқали жўнатган. Қозоғистон божхонаси уни фитосанитар текширувдан ўтказиш учун тўхтатган. Оқибатда сабзавот вагонларда 10 кундан ортиқ ётган ва музлаб, бузилиб кетган.

«Мана, чириди. Сув аллақачон оқмоқда, ҳаммаси оқмоқда! Аввал музлаб қолди, кейин эриди, тамом. Битта вагонда 68 тонна бор. Лекин у аллақачон яроқсиз!» деди тадбиркор Азамат Серикбоев.

Тадбиркорларнинг айтишича, бу картошка энди ҳатто қорамолга ҳам ярамайди. Уларнинг таъкидлашича, ҳужжатлар январ ойи ўрталарида, картошка экспортига тақиқ жорий этилгунга қадар тўлдирилган. Шу сабабли, ишбилармонлар юкни узоқ вақт ушлаб туриш учун ҳеч қандай сабаб кўрмаяпти.

Қозоғистонда картошка нархи кескин ошиб кетгани туфайли ҳукумат 19 январ куни бу маҳсулотнинг учинчи давлатга экспортини 6 ойга чеклаган эди.

Қозоғистон Қишлоқ хўжалиги вазирлиги сабзавот ортилган вагонлар зарур кўрикдан ўтганини ва Ўзбекистонга йўл олиши учун ҳеч қандай тўсиқ йўқлигини таъкидлади.

Бироқ, тадбиркорлар энди бунчалик кечиккан рухсатномага муҳтож эмаслигини айтмоқда. Зарар кўрган бешта компания вакиллари мансабдор шахсларни судга бериш ниятида эканлигини маълум қилган.