Брюссел Россияга қарши санкцияларни узайтиришга тайёрланмоқда

Евроиттифоқнинг Россияга нисбатан жорий санкциялари ҳар олти ойда бўлгани каби яна узайтирилади — бу Брюсселда Европа Иттифоқи ташқи ишлар вазирларининг 27 январ, душанба куни бўлиб ўтадиган учрашуви олдидан расмийлар ва дипломатлар томонидан айтилган тахмин. «Биз Россияга қарши санкциялар режимини узайтириш устида ишлаяпмиз ва бу санкциялар яқин кунларда қабул қилинишидан бошқа вариантни кўрмаяпмиз», — деди ЕИнинг юқори мартабали расмийси 24 январ, жума куни Брюсселда бўлиб ўтган брифингда.

Унинг эслатишича, Россиянинг Украинадаги тажовузи муносабати билан Европа Иттифоқи уч йўналишда ҳаракат қилмоқда: Украинани қўллаб-қувватлаш, Владимир Путин сиёсатига қарши туриш ва Россиянинг Украинага қарши уруши глобал оқибатларини бартараф этиш. «Санкциялар стратегиямизнинг асосий қисмидир», деди у. Расмийнинг сўзларига кўра, бу чеклов чоралари Путин режимига Украинага қарши уруш олиб бориш учун кўпроқ активлардан фойдаланишига тўсқинлик қилиб, унга зарар етказади. «Россия тажовузкорлигини давом эттирар экан, унга қарши санкциялар қўлланилади», — деди у ва бу масала Россия газининг Украина орқали ўтиши билан ҳеч қандай алоқаси йўқлигини айтди.

27 январ куни Европа Иттифоқининг бир мамлакатидан келган вазир бу масалани Ташқи ишлар кенгашида кўтариши мумкин, дейди расмий Венгрияга ишора қилиб, бироқ Европа комиссияси бирмунча вақт олдин Россия газининг Украина орқали транзитини тўхтатиб қўймайди деган хулосага келган. Бу бутун Европа Иттифоқи ёки унинг алоҳида аъзоларининг энергия хавфсизлигига таҳдид солади.

«Биз якдилликка ишонамиз»

«Санкцияларни узайтириш якдилликни талаб қилади ва биз Россияга қарши бу алмаштириб бўлмайдиган чораларни давом эттиришимизга умид қиламиз ва кутамиз», деди исмини ошкор қилмаслик шарти билан гапирган европалик дипломат журналистлар билан суҳбатда. Унинг таъкидлашича, Россиянинг Украинага кенг кўламли бостириб кириши бошланганидан бери Европа Иттифоқи барча долзарб масалалар бўйича консенсус топишга, қатъий чоралар кўришга ва Киевни қўллаб-қувватлашда ягона позицияни намойиш этишга муваффақ бўлди.

«Биз бу ҳақда кўп марта муҳокама ўтказдик ва албатта, қийинчиликлар ва тўсиқлар бўлди. Ҳозир 2022 йил февралидан бери ҳар олти ойда бўлгани каби, санкциялар узайтирилади деган тахминдан келиб чиқиб иш тутяпмиз», — деди дипломат. Унинг таъкидлашича, нима бўлишидан қатъи назар, қарор жорий санкциялар муддати тугагунга қадар - 31 январгача қабул қилиниши керак.