Трамп Кеннедининг ўлдирилиши бўйича ҳужжатларни махфийликдан чиқаришни буюрди

АҚШ президенти Доналд Трамп 23 январ, пайшанба куни АҚШнинг 35-президенти Жон Кеннеди, унинг укаси, АҚШ собиқ бош прокурори Роберт Кеннеди ва воиз Мартин Лютер Кингнинг ўлдирилиши билан боғлиқ ҳужжатларни махфийликдан чиқариш тўғрисидаги фармонни имзолади.

«Президент Жон Кеннедининг ўлдирилиши билан боғлиқ ҳужжатлардаги маълумотларни таҳрирлаш ва яширишни давом эттириш жамоат манфаатларига мос келмайди ва бу ёзувларни эълон қилиш муддати анчадан буён ўтиб кетган деган хулосага келдим», — дейилади Оқ уй сайтида эълон қилинган ҳужжатда.

Миллий разведка директори ва бош прокурор президентнинг Миллий хавфсизлик масалалари бўйича ёрдамчиси ва президент маслаҳатчиси билан биргаликда 15 кун муддатда президентга Жон Кеннедининг ўлдирилишига оид тергов билан боғлиқ ҳужжатларни тўлиқ эълон қилиш режасини тақдим этишлари шарт.

Бундан ташқари, 45 кун ичида улар Роберт Кеннеди ва Мартин Лютер Кингнинг ўлдирилиши бўйича тергов материалларини ўрганишлари ва уларни эълон қилиш режасини тақдим этишлари керак.

Учта шов-шувли қотиллик

Жон Кеннеди АҚШ президенти этиб сайланганидан икки йил ўтиб, 1963 йил 22 ноябрда Далласга расмий ташрифи чоғида отиб ўлдирилган. Собиқ денгиз пиёда аскари Ли Харви Освалд қотилликда гумонланиб ҳибсга олинди. У уч кундан кейин тунги клуб эгаси Жек Руби томонидан отиб ўлдирилган, кейинчалик у қамоқда вафот этган.

Унинг укаси Роберт Кеннеди АҚШ бош прокурори (1961-1964) ва Ню-Йорк штатидан сенатор (1965-1968) бўлган. У демократ сифатида президентликка даъвогарлик қилган ва 1968 йил 5 июнда Лос-Анжелесда сайловолди ташвиқоти митингида отиб ўлдирилган. Фаластинлик Сирхан Сирхон жиноят содир этилган жойда қўлга олинган. 1969 йилда у ўлимга ҳукм қилинган, аммо кейинчалик ҳукм умрбод қамоқ жазосига алмаштирилган.

1968 йил 4 апрелда Мемфисда (Теннесси) қора танлиларнинг фуқаролик ҳуқуқлари ҳаракати раҳбари, баптист воиз Мартин Лютер Кинг ўлдирилди. Унга: «Тўрт фарзандим бир кун келиб тери рангига эмас, шахсий хизматларига қараб баҳоланадиган юртда яшашини орзу қиламан», деган ибора тегишли. Бир неча марта судланган Жеймс Эрл Грей Мартин Лютер Кингнинг ўлдирилишида айбланиб, 99 йилга қамалган. У 1988 йилда қамоқда вафот этди.