Хўжалик юритувчи субъектлар учун қатор имтиёзлар бекор қилинмоқда

Вазирлар Маҳкамасининг «Экспортни қўллаб-қувватлаш чора-тадбирларининг Жаҳон савдо ташкилоти битимларига мувофиқлаштирилиши муносабати билан Ўзбекистон ҳукуматининг айрим қарорларига ўзгартиришлар киритиш тўғрисида»ги қарори қабул қилинди.

Нефт-газ тармоғи объектларининг валюта эҳтиёжини тўла қондириш мақсадида «Ўзбекнефтгаз» АЖ бирлашмалари Кўкдумалоқ ва Мингбулоқ конларида геологик қидирув ишларини олиб бориш ва ушбу конларни ўзлаштириш мобайнида ҳамда нефтни қайта ишлаш заводи қурилишини ниҳоясига етказиш муддатига қадар маҳсулотларни экспорт қилишдан ундириладиган солиқ тўловларидан озод қилинишини белгиловчи норма бекор қилинмоқда.

Шунингдек, экспорт қилувчиларнинг автомобил, ҳаво ва темирйўл транспортида экспортга ташиш харажатларини компенсация қилиш амалиёти тўхтатилмоқда.

ЭИЗда рўйхатга олинган хўжалик юритувчи субъектлар четдан олиб келинадиган ускуналар, шунингдек, ЭИЗ фаолиятининг бутун даврида маҳсулотларни экспорт қилиш мақсадида маҳсулот ишлаб чиқариш учун хомашё, материаллар ва бутловчи қисмлар учун божхона тўловларидан озод қилинишини ҳамда «Ангрен» ЭИЗ ва «Жиззах» ЭИЗ иштирокчилари эркин иқтисодий зоналарнинг бутун фаолияти даврида четдан олиб келинадиган хомашё, материаллар ва бутловчи қисмлар учун божхона тўловларидан озод қилинишини белгиловчи нормалар бекор қилинмоқда.

#имтиёз #субъект