FT: Киев Ғарбдаги иттифоқчилари Украинага 50 минг ҳарбий юборишига умид қилмоқда

Украина ўт очиш тўхтатилса, Ғарбдаги шериклари мамлакатга 40-50 минг тинчликпарвар кучларни юборишига умид қилмоқда. Бу ҳақда украиналик амалдорларга таяниб, Financial Times хабар берди.

Буюк Британия бош вазири Кир Стармер ва НАТО бош котиби Марк Рютте ушбу масалани 3 феврал куни бўлиб ўтадиган «норасмий сайёр йиғилишда» муҳокама қилиши кутилмоқда. Шу билан бирга, нашрнинг эслатишича, ҳозирча тинчликпарвар кучларни жойлаштиришни фақат Болтиқбўйи давлатлари қўллаб-қувватлаган. Полша ўз қўшинларини юбормаслигини билдирган, Германия канцлери Олаф Шолц эса ушбу ғояга кескин қаршилик билдирмоқда.

НАТО бош котибининг мудофаа инвестициялари бўйича собиқ ёрдамчиси Камил Гранднинг таъкидлашича, 40 минг ҳарбий Украинага зарур ҳимояни таъминлай олади. Унинг сўзларига кўра, шу орқали Киев «осон нишонга» айланиб қолмайди ва қўшимча куч талаб қилмайди. Гранднинг таъкидлашича, бундай кучлар Британия, Франция ва Нидерландия бошчилигидаги коалиция доирасида шакллантирилиши мумкин.

Володимир Зеленский Европа Россия босқинини тўхтатишни жиддий хоҳлаётган бўлса, Украинага камида 200 минг ҳарбий хизматчи жойлаштириши кераклигини айтган. Нашр ушбу кутилмалар ҳақиқатга тўғри келмаслигини, чунки бу Иккинчи жаҳон урушидаги «Д куни»да иштирок этган қўшинлардан ҳам кўплигини таъкидлаган.

Зеленскийнинг ўзи Bloombergʼга берган интервюсида 200 минг тинчликпарвар кучни жойлаштириш ҳақидаги гаплари нотўғри тушунилганини билдирган. Унинг айтишича, тинчликпарвар кучлар сони Украина ўз армиясини қанчага қисқартиришга боғлиқ бўлиши керак.

«Агар биз армияни 200 минг, 300 минг ёки 500 минг кишига қисқартирсак, бунинг ўрнига шунча бошқа қўшинлар керак бўлади», — деган Зеленский.

Аввалроқ Буюк Британия бош вазири Кир Стармер ва Франция президенти Эммануэл Макрoн британ ҳамда француз аскарларини Украинага юборишни муҳокама қилаётгани тўғрисида хабар берилганди.