Қирғизистонда тирбандликларга барҳам бериш учун пойтахтни кўчириш таклиф қилинди

Жогорку Кенгеш депутатининг сўзларига кўра, Иссиқкўлда Асман шаҳри қурилмоқда ва у ерга 10 млрд сўм инвестиция жалб қилинган. «Пойтахт кўчирилса, йўл тирбандликлари муаммоси ҳал бўлади», дейди у.

Фото: Табылды Кадырбеков

Қирғизистон Жогорку Кенгешида Бишкекдаги тирбандликлар муаммосини ҳал этиш учун пойтахтни бошқа ерга кўчириш таклиф қилинди, деб хабар беради Kazinform.

Депутат Бакитбек Мариповнинг сўзларига кўра, пойтахтни икки бошли мэр бошқарса ҳам, смог ва тирбандлик масаласи ҳал бўлмайди.

«Пойтахтимизни бошқа ерга кўчиришни таклиф қиламан. Бу масалани кўриб чиқиш керак. Иссиқкўл вилоятида Асман шаҳри қурилмоқда, у ерга 10 миллиард сўм инвестиция жалб қилинган. Темирйўлни пойтахтдан ташқарига кўчириш учун 550 миллион доллар талаб этилади, шунингдек, айланма ҳалқа йўлини қуришга 1 миллиард доллардан ортиқроқ маблағ керак. Пойтахт кўчирилса ва вазирлар маҳкамаси шаҳардан ташқарига олиб чиқилса, йўл тирбандликлари муаммоси ҳал бўлади», — дейди депутат.

Бундан олдин депутат Элмурза Сатибалдиев Бишкекда тирбандликлар муаммосини ҳал этиш учун пойтахт мэриясига ўнг томонли рулга эга машиналарнинг шаҳарга киритилишини тақиқлашни таклиф қилганди. Шунингдек, мамлакат парламенти Бишкекда зарарли газларнинг атмосферага чиқишини камайтириш учун Қозоғистон кўмирини харид қилиш таклифини берган.

Эслатиб ўтамиз, 2019 йилда Ўзбекистон Ёзувчилар уюшмаси аъзоси Эврил Турон Ўзбекистон пойтахтининг Тошкент шаҳридан Жиззах вилоятига ўзгартиришни таклиф этганди. У бу ҳақда «Олтин ўлка» эссесида баён қилиб, таклифини асослантиришга уринган.

#Бишкек #пойтахт