ИҲМА ижтимоий картага оид саволларга изоҳ берди

Ижтимоий ҳимоя миллий агентлиги ўтган йил охиридан ижтимоий карталар беришни бошлаганди. Улар ҳозирча Тошкент шаҳри ва Тошкент вилоятининг Янгийўл туманида синов тариқасида жорий этилган.

Қайд этилишича, айни пайтда 9 турдаги тўловлар ушбу карта орқали бериляпти. 2025 йилнинг 1 апрелидан булар қаторига яна 2 турдаги ижтимоий тўловлар — ҳомиладорлик ва туғиш нафақаси, шунингдек, “Саховат ва кўмак”, “Аёллар дафтари” ва “Ёшлар дафтари” жамғармалари ҳисобидан тўланадиган бир марталик моддий ёрдамлар қўшилади.

Kun.uz ижтимоий карталар учун нега Visa платформаси танлангани, лойиҳанинг бюджети ва оператори ҳақида қўшимча маълумот сўраб, агентликка сўров жўнатганди.

Маълум қилинишича, Visa картаси асосида чиқарилган ижтимоий картадаги пулни нақдлаштириш учун комиссия тўлови бир фоиздан ошмаган миқдорда бўлади.

“2022 йилдан бошлаб айрим турдаги ижтимоий тўловларга банк пластик картаси орқали тўланганида бир фоиз миқдорида қўшимча тўлов тўланади. Бунда фуқаролар пенсия ва нафақаларини банкоматлар орқали нақдлаштирганда қўшимча харажат бўлмайди. Шунингдек R2R ўтказмалари учун ҳам комиссион тўловлар республика бўйича ўртача миқдорда бўлади. Таъкидлаб ўтиш керакки, республика тижорат банклари томонидан чиқарилган сўм Visa карталари, айниқса ижтимоий карталар учун ўрнатилган комиссион тўловлар чет эл валютасидаги Visa картаси учун ўрнатилган комиссион тўловлардан фарқ қилади. Ижтимоий карталар орқали тўловларни амалга оширганда комиссион харажатлар ижтимоий карта эгасидан эмас, балки сотувчи (хизмат кўрсатувчи)дан олинади”, дейилади агентлик изоҳида.

Visa тўлов тизими қуйидаги сабабларга кўра танланган:

• Visa карталари барча миллий тўлов тизимларининг тўлов терминаллари орқали қабул қилинади;
• Visa Flex технологияси орқали мониторинг ва назорат функцияларини жорий этиш ҳамда бир электрон ҳамён бўйича бир нечта ижтимоий тўловларни бошқариш имконияти;
• транзакциялар хавфсизлиги миллий тўлов тизимларининг хавфсизлигидан кам бўлмаган даражада таъминланган;
• ижтимоий ҳимояга муҳтож айрим шахсларнинг чет элда харажат қилиш эҳтиёжлари мавжуд.

Амалдаги тартибдан келиб чиқилса, Visa картани одатда фақатгина шу картани чиқарган банк иловасигагина улаш мумкин. Агентликнинг маълум қилишича, ижтимоий картани Payme мобил иловасига бириктириш ва картадан картага пул ўтказиш мумкин. Келгусида тўловларни амалга ошириш имконияти ҳам яратилади.

Лойиҳа бюджети ва оператори

Агентлик хабарига кўра, дастлабки босқичда лойиҳа Абу-Дабида жойлашган Oxinus Holding Limited компаниясидан 3 млн доллар миқдорида сармоя олган. Оператор ва лойиҳанинг бошқа иштирокчилари лойиҳа офиси томонидан ишлаб чиқиладиган техник талаблар асосида танланади. Ҳозирги вақтда ижтимоий карта “Халқ банки” орқали ишлайди ва мобил илова ишлаб чиқиляпти.