Доналд Трамп инаугурация маросимини Капитолий ичида ўтказишга қарор қилди

2025 йил 20 январда Доналд Трампнинг инаугурацияси Вашингтондаги Капитолий биноси ташқарисида эмас, ичида бўлиб ўтади. Бу ҳақда республикачининг ўзи 17 январ, жума куни TruthSocial ижтимоий тармоғида ёзган.

Трампнинг инаугурация кунида Вашингтондаги об-ҳаво

Трампнинг айтишича, АҚШ пойтахтида 20 январ куни совуқ Арктика шамоллари ва «рекорд паст ҳароратлар» кузатилиши кутилмоқда. Метеорология хизмати маълумотларига кўра, душанба куни Вашингтонда ҳаво ҳарорати кундузи -5°C, кечаси эса -12°C гача пасаяди.

Республикачининг фикрича, бу минглаб фавқулодда вазиятлар ходимлари ва маросим томошабинлари учун хавфли бўлиши мумкин. «Мен одамларнинг ҳеч қандай зарар кўришини ёки жароҳатланишини хоҳламайман, - деб ёзган сайланган президент. - Шунинг учун мен инаугурация нутқи, шунингдек, бошқа нутқлар Капитолий ротондасида айтилишини буюрдим».

Доналд Трамп Capital One Arena пойтахт стадионида томошабинлар учун маросимнинг жонли эфири ташкил этилишини қайд этди. Президентнинг ўзи тарафдорларини кутиб олиш учун лавозимга киришгач, у ерга келишга ваъда берган.

Вашингтондаги Миллий аллеяда, маросим ўтказилиши режалаштирилган Капитолий зинапояси олдида аллақачон минглаб стуллар ўрнатилган, деб хабар беради AFP. Энди улар керак бўлмайди. Капитолий ротондасидаги залнинг ўзи бир неча юз кишини сиғдира олади, дея таъкидлайди агентлик.

АҚШ президенти инаугурацияларида совуқ об-ҳаво

Одатда, АҚШ президентининг инаугурация маросими Капитолий биноси олдидаги кўчада бўлиб ўтади. Масалан, Трамп 2017 йил 20 январда лавозимга киришганида ҳам шундай бўлган. Республикачининг ўзи эслаганидек, 1985 йилда Роналд Рейганнинг инаугурацияси пайтида совуқ об-ҳаво туфайли маросим Капитолий ротондасига кўчирилган эди.

AFP эслатганидек, АҚШнинг тўққизинчи президенти Уилям Генри Харрисон 1841 йилда инаугурация маросимида ёмон об-ҳавога эътибор бермай, шляпа ва палтосиз шамолда туриб узоқ нутқ сўзлаган. Бир ой ўтгач, 68 ёшли сиёсатчи пневмониядан вафот этган.