Россия думаси хорижда яшовчи «чет эл агентларини» жавобгарликка тортиш ниятида

Россия Давлат думасининг «Хорижий давлатларнинг Россия ички ишларига аралашуви фактлари»ни текшириш комиссияси 14 январ, сешанба куни парламентнинг баҳорги сессиясида «ноқонуний фаолиятга чек қўйиш»га қаратилган қонун лойиҳалари пакетини қабул қилиш ниятида эканлигини маълум қилди. Унда Россияда «чет эл агенти» сифатида тан олинган шахслар ва ташкилотлар назарда тутилган.

Жумладан, Маъмурий жавобгарлик тўғрисидаги кодекснинг тегишли моддасига хорижда жойлашган «чет эл агентлари»ни жавобгарликка тортиш имконини берувчи ўзгартиш киритиш кўзда тутилган. Бундан ташқари, эълон қилинган пакетдаги қонун лойиҳаларининг бир қисми, комиссия раиси Василий Пискаревнинг сўзларига кўра, «чет эл агентлари»нинг Россия «таълим ва маърифат тизими»га «таъсири»нинг олдини олишга қаратилган. Парламент аъзоси ҳеч қандай қўшимча маълумот тақдим этмади.

«Чет эл агентлари»га пассив даромад олиш тақиқланди

28 декабр куни Россия президенти Владимир Путин «чет эл агентлари»нинг Россияда пассив даромад олишини тақиқловчи қонунни имзолади. Эндиликда «чет эл агентлари» ёки уларга маблағ ўтказувчи шахслар кўчмас мулк ва транспорт воситаларини сотишдан тушган даромадлар, шунингдек, уларни ижарага беришдан олинган даромадлар, омонат фоизлари ва дивидендлар, интеллектуал фаолият, ижодий фаолиятдан олинган даромадларни депозитга қўйиш учун махсус ҳисобварақлар очишлари шарт. Ушбу маблағлардан фақат «чет эл агенти» мақоми бекор қилингандан кейингина фойдаланиш мумкин бўлади.

Ҳозирги вақтда Россия Федерациясидаги «чет эл агентлари» рўйхатига 400 дан ортиқ шахслар киради. 2023 йил бошидан 2024 йил ўрталарига қадар Россияда «чет эл агентининг фаолияти тартибини бузганлик» учун жами 25,8 миллион рубл миқдорида жарималар қўлланди.

Давлат думаси «номақбул» ташкилотлар доирасини кенгайтирди

2024 йил 8 февралда Василий Пискарев «номақбул ташкилотлар» рўйхатига нафақат нодавлат нотижорат ташкилотлари (ННТ), балки давлат хорижий ва халқаро ташкилотларни ҳам киритишни таклиф қилди. Ўша йилнинг 23 июлида Дума тегишли қонун лойиҳасини қабул қилди.