Калифорнияда ёнғинлар оқибатида кўрилган зарар 275 млрд долларга баҳоланмоқда

Энг йирик ёнғинлардан бири айни вақтда Санта-Моника ва Малибу шаҳарлари орасидаги ҳудуд бўйлаб ёйилган — у ердан АҚШдаги энг қиммат турар-жой бинолари ўрин олган.

Фото: AP Photo

Калифорнияда ўрмон ёнғинлари оқибатида етказилган зарар миқдори 250-275 миллиард долларга етиши мумкин. Бу ҳақда метеорологик маълумотларни тақдим этиш билан шуғулланувчи AccuWeather ҳисоб-китобларида сўз боради.

Сўнгги маълумотларга кўра, олов 160 километр квадратдан ортиқ майдонга тарқалган.

«Бу Калифорния тарихидаги энг даҳшатли ўрмон ёнғинларидан бири. Агар яқин кунларда янада кўпроқ иншоотлар ёниб кетса, ўрмон ёнғинлари кулга айланган бинолар ва иқтисодий йўқотишлар бўйича штатнинг замонавий тарихидаги энг йирик офатга айланади», — дейди AccuWeather бош метеорологи Жонатан Портер.

Портернинг қўшимча қилишича, ёнғин оқибатида дастлабки ҳисоб-китобларга кўра, 250-275 миллиард доллар зарар етказилмоқда. Унинг сўзларига кўра, Лос-Анжелес аҳолиси, уларнинг уйлари, маҳаллий бизнес ва туризм учун хавф сақланиб қоляпти. Бундан ташқари, айрим ҳудудларга етказилган зарар кўлами ҳозирча номаълум.

Энг йирик ёнғинлардан бири айни вақтда Санта-Моника ва Малибу шаҳарлари орасидаги ҳудуд бўйлаб ёйилган — у ердан АҚШдаги энг қиммат турар-жой бинолари ўрин олган. Аланга мазкур ҳудудда 95,9 километр квадрат майдонга тарқалган.

Лос-Анжелесда ёнғинлар 7 январ куни бошланди ва шиддат билан тарқалди. Ҳозирга қадар камида 24 киши ҳалок бўлган, 12 мингдан ортиқ иншоот ёниб кетган. Президент Жо Байден штатда кенг кўламли офат режимини эълон қилган.

#Лос-Анжелес #ўрмон ёнғинлари