Қозоғистонда AZAL йўловчиларини қутқаришда иштирок этган 19 кишига давлат мукофотлари топширилди

Оқтов яқинига қулаган Azerbaijan Airlines самолёти йўловчиларини қутқаришда иштирок этган қозоғистонликларга Қосим-Жўмарт Тўқаевнинг қарори билан орден ва медаллар топширилди.

Қозоғистонда Azerbaijan Airlines авиакомпаниясига тегишли самолёт ҳалокатида йўловчиларни қутқаришда иштирок этган бир гуруҳ фавқулодда вазиятлар ва тиббиёт ходимлари, полициячилар, Манғистов ҳудудий электр тармоқлари компанияси ва Оқтов халқаро аэропорти ишчиларига давлат мукофотлари топширилди.

Қайд этилишича, Манғистов области раҳбари Нурдаулат Қилибай мамлакат президенти Қосим-Жўмарт Тўқаевнинг қарорига кўра 19 кишига давлат мукофотлари — орден ва медалларни топширган. Шунингдек, яна 51 кишига давлат раҳбари номидан ташаккурномалар берилди.

25 декабр куни Бокудан Грознийга учган Azerbaijan Airlines (AZAL) самолёти Оқтов яқинида ҳалокатга учради. Самолёт бортида 67 киши, жумладан беш нафар экипаж аъзоси бўлган. Ҳодиса оқибатида 38 киши ҳалок бўлди.

Озарбойжон президенти Илҳом Алиев самолёт Россия ҳудудида «ташқи таъсир бўлгани» туфайли ҳалокатга учраганини маълум қилди. 28 декабр куни РФ президенти Владимир Путин Илҳом Алиев билан телефон орқали мулоқот қилди ҳамда «Россия ҳаво кенглигида рўй берган фожиали ҳодиса» учун узр сўраб, қурбонларнинг оилаларига ҳамдардлик билдирди.

Ўз навбатида Алиев AZAL самолётининг Оқтовдаги ҳалокати оқибатларини бартараф қилишда, жабрланганларни қутқаришда кўрсатилган ёрдам учун Қозоғистон халқига миннатдорлик билдирган.

#Қозоғистон #AZAL

25 декабр тонгида Бокудан Грознийга учган самолёт йўналишини ўзгартириб, Қозоғистоннинг Оқтов шаҳри аэропорти яқинида авариявий қўнишни амалга оширди. Авиаҳалокатда 38 киши ҳалок бўлди.