«Бу кинони олдин ҳам кўрганмиз». Обама Трампнинг иккинчи муддати хавфидан огоҳлантирди

«Тарих Жо Байденни катта хавф остида қолган демократияни ҳимоя қилган президент сифатида эслаб қолади, — деган у. — Энди биз ўзимиз ишонадиган Америка учун курашишимиз даркор. Ва адашманг, бу чинакам кураш бўлади».

Американинг илк қора танли президенти бўлган Обама ўзининг жиддий сиёсий капиталини Ҳаррисни қўллаб-қувватлаш учун ишлатди, у ноябрдаги сайловларда ғолиб чиқса, АҚШ президентлигига сайланган илк қора танли аёлга айланади.

У шунингдек АҚШ президентлигига яна Доналд Трамп сайланиши мумкин бўлган сценарий хавфидан огоҳлантирди.

«Бизга яна тўрт йил беҳуда гап-сўзлар, беадаблик ва тартибсизликлар керак эмас. Биз бу кинони олдин ҳам кўрганмиз ва барчамиз биламизки, давоми одатда янада ёмонроқ бўлади, — деган Обама қурултой делегатларига. — Америка янги саҳифа очишга тайёр. Америка энг яхши ҳикояга тайёр. Биз Камала Ҳарриснинг президентлигига тайёрмиз».

«Сўнгги ҳафталарда биз эга бўлган ақл бовар қилмас энергияга қарамай, бу ҳали ҳам иккига бўлинган мамлакатдаги ўта кескин кураш бўлади», — дея қўшимча қилган собиқ президент.

«Қора танлилар учун иш ўрни»

Собиқ президентнинг рафиқаси Мишел Обама ҳам қурултойда чиқиш қилиб, Ҳаррис — АҚШ президенти лавозими учун энг муносиб номзод эканини айтди: «Унинг тарихи — бу сизнинг тарихингиз. Бу менинг тарихим. Бу яхши ҳаёт қуришга интилаётган жуда кўпчилик америкаликлар тарихи».

У Трамп Ҳаррисни қоралаш учун бор кучини ишга солишидан огоҳлантирди ва республикачилар номзодининг яқинда АҚШга келаётган ноқонуний муҳожирлар «қора танлиларнинг иш жойлари»ни эгаллаб олаётгани тўғрисида айтган гапларига жавоб қайтарди.

«Чекланган ва тор дунёқараши уни икки меҳнаткаш, олий маълумотли, муваффақиятли, қолаверса қора танли бўлган одамлар мавжудлиги таҳдидини ҳис қилишга мажбур қилди, — деган у гулдурос қарсаклар остида. — У ўзи қўлга киритишга ҳаракат қилаётган иш ҳам „қора танлилар учун иш ўрни“ бўлиши мумкинлигини унга ким айтади?»

Камала Ҳарриснинг ўзи Милуокидаги сайловолди митингига кетгани туфайли қурултойда видеоалоқа орқали қатнашди. У бу вақтда июл ойида Республикачилар партиясининг Трамп номзоди президентликка расман илгари сурилган миллий қурултойи ўтказилган бинода эди.

Ўз нутқида Ҳаррис Трампни АҚШ Олий судининг аёлларнинг аборт қилиш ҳуқуқини бекор қилган қарорини қўллаб-қувватлагани учун танқид қилди.

«Мен ёмон хатти-ҳаракатларнинг оқибати бўлиши кераклигига ишонаман. Биз ноябр ойида, сайловчилар овоз бериш учун қутилар олдига боришганида у жазосини олиши учун қайғурамиз», — деган Ҳаррис.

Демократлар аборт ҳуқуқини сайлов кампаниясидаги асосий кузири сифатида кўрмоқда, Ҳарриснинг ўзи вице-президент эканида бу масала билан шуғулланган.

Демократлар қурултойида Трампнинг ҳаракатларига қўшилмагани учун партияни тарк этган айрим республикачилар ҳам чиқиш қилди.

Трамп президентлиги даврида Оқ уйда матбуот котиби бўлган Стефани Гришэм собиқ президентнинг «чинакам тарафдори» бўлишдан 2021 йил 6 январида Трамп тарафдорларининг Капитолийга ҳужумидан кейин Оқ уйнинг истеъфо берган илк юқори мартабали ходими бўлишгача йўлни қандай босиб ўтгани ҳақида сўзлаб берди.

Аризона штати Меса шаҳридан бўлган республикачи мэр Жон Жайлс турли партиялар тарафдорлари ўртасидаги келишмовчиликларга барҳам беришни ўз бурчи деб билган марҳум республикачи сенатор Жон Маккейн ёдга олди.

«Мен каби сиёсий спектр марказида турган кўплаб америкаликлар учун муҳим хабарим бор, — деган у. — Жон Маккейннинг Республикачилар партияси энди йўқ ва биз унда қолишга мажбур эмасмиз».

Трампни ёқтирмайдиган консерватив сайловчилар — демократларнинг бўлғуси сайловлардаги асосий умидларидан бири. Партиянинг вазифаси бундайларни сайлов куни ўз уйида ўтирмасдан, Ҳаррисга овоз бериш учун сайлов участкаларига боришга ишонтиришдир.