Волгоградда поезднинг релсдан чиқиб кетиши оқибатида 100 дан ортиқ киши жабрланди

Россия Федерациясининг Волгоград вилоятида йўловчи поезди вагонлари релсдан чиқиб кетиши оқибатида 100 дан ортиқ киши жабрланди. Бу ҳақда 29 июл, душанба куни Россия Фавқулодда вазиятлар вазирлигининг Телеграм-каналида хабар берилди. 

«Тўққизта вагон релсдан чиқиб кетди, улардан 7 таси ағдарилди. Дастлабки маълумотларга кўра, 100 дан ортиқ одам жароҳатланган», — дейилади хабарда. 

Департаментнинг қайд этишича, поезд релсдан чиқиб кетган жойда фавқулодда қутқарув ишлари олиб борилмоқда. «Ёнғин ва қутқарув бўлинмалари жабрланганларни қутқарди ва биринчи тиббий ёрдам кўрсатди. Поезд йўловчиларини вақтинчалик жойлаштириш пунктларига етказиб бериш ташкил этилди – Котелниково шаҳрида 8 та шундай жой тайёр», — дейилади маълумотда. 

Максим Горкий станциясидан авария жойига қутқарув ва ёнғин ўчириш поездлари йўлга чиқди, дея қўшимча қилди Россия Фавқулодда вазиятлар вазирлиги. 

Аввалроқ воқеа жойида 324 нафар мутахассис ва 109 дона техника ишлаётгани, иккита вертолёт учишга тайёрлиги хабар қилинган эди. 

Бундан олдин «Российские железные дороги» («РЖД») Россия Федерациясининг Волгоград вилоятида саккизта поезд вагонининг релсдан чиқиб кетгани ҳақидаги хабарларни тасдиқлади. 

«Соат 12:35 да Волгоград вилоятидаги Гремячая - Котелниково кўчасида КАМАЗ юк машинаси ҳайдовчиси темирйўл кесишмасига чиқиб кетиб, 491-сонли Қозон - Адлер йўловчи поезди билан тўқнашиб кетди», дейилади матнда.

Волгоград вилояти маъмуриятининг расмий Телеграм-канали поездда 812 киши бўлганини таъкидлади.