Спорт | 18:22 / 28.08.2023
31482
19 дақиқада ўқилади

«Барса»да янги юлдуз, «Реал» жароҳатлар гирдобида. Ҳафта ўйинлари якунлари

Ҳафта охирида Европада навбатдаги тур ўйинлари ўтказилди. Ўйинлардаги голлар ва турнир жадвалларидаги вазият.

Испания: олқишланган вундеркинд

«Вилярреал» — «Барселона» 3:4
Голлар:
Фойт (26), Сёрлот (40), Баэна (50) — Гави (12), де Йонг (15), Торрес (68), Левандовски (71).
Вилярреал – Йоргенсен, Фойт, Габбия, Куэнка, Терратс (Комесанья, 70), Педраса, Алекс Баэна (Моралес, 77), Капу (Денис Суарес, 70), Парехо (Бреретон, 86), Херар Морено (Аҳомаш, 70), Сёрлот.
Барселона – тер Стеген, Сержи Роберто, Кристенсен (Эрик Гарсия, 46), Кунде, Алонсо, Гундўған (Лопес, 86), Ромеу (Ферран Торрес, 63), де Йонг, Гави, Ямал (Фати, 76), Левандовски.
Огоҳлантиришлар: Ямал (44), Фойт (45), Левандовски (45), Терратс (57), Габбия (80), Гарсия (82).

«Барселона» юзага келаётган муаммоларни жойида ҳал қилмоқда, аммо бу жараён осон кечаётгани йўқ. Балденинг саломатлигида муаммо чиқиши Алонсонинг шартномасини рўйхатга олишни тезлаштирди, аммо машғулотлар чоғида Педри октябр ойигача сафдан чиқди. Бу йўқотишнинг ҳам ўрни ёпилгандек кўринганди, чунки 15-дақиқага келиб кўк- анорранглилар икки гол фарқи билан олдинга чиқиб олишди, марказий яримҳимоячилар — Френки де Йонг ва Гави биттадан гол уришди.

Аммо Кике Сетен бошқарувидаги «Вилярреал» жуда яхши формада, шунинг учун «сариқ субмариналар»ни таблодаги 0:2 ҳам, урилган гол офсайд туфайли бекор қилиниши ҳам тўхтата олмади. Улар яна бир бор бурчакдан тўпни ўйинга киритганида Фойт барча қоидаларга тўғри келадиган голни урди. Танаффус арафасида эса меҳмонлар ҳимоясида парокандалик юзага келиб, Жерар Морено ва Педраса Серлотни қулай вазиятга чиқаришди. Бу ҳужумни бошлаб берган норвегиялик ҳужумчининг ўзи дарвозабонни осонлик билан доғда қолдирди.

Мезбонлар шундан кейин ҳам ҳужум қилишда давом этишди. Иккинчи бўлимда Педраса майдон марказида аввалига Сержи Робертони ортда қолдирди, кейин Ориол Ромеудан қочиб кетди ва чап қанотдан етиб келган Алекс Баэнени тўпни ташлаб берди, у эса тўпни олис бурчакка аниқ йўллади. Бироқ бу ўйин икки жамоанинг биргаликдаги тақдимоти эди ва ўйинда бурилиш ясалиши «Барса» футболчиларининг руҳиятини чўктира олмади. Ёш Ямал, 16 ёшу 45 кунлигида ла лига тарихидаги энг ёш пас муаллифига айланди (де Йонгга ҳисобни очувчи голни уришда ассистентлик қилганди), иккинчи бўлимда эса аввалига унинг зарбаси тўсинга тегди, кейин эса устунга.

Иккинчи ҳолатда устундан қайтган тўпга биринчи бўлиб Левандовски етиб келди. Бундан олдинроқ эса Гави рақиб жарима майдони ичида тўп учун курашда устун келди ва Ферран Торресга қаторасига иккинчи турда захирадан тушиб гол уришга ёрдам берди, натижада қисқа вақт ичида 3:2 ҳисоби 3:4 кўринишига ўзгарди. Бундай ўйинидан кейин Ямални алмаштириш чоғида ҳатто мезбон мухлислар ҳам олқишлашди. Бу истеъдодли футболчининг чинакамига тан олинишидир ва энди Дембеле Парижга қочиб кетгани учун афсусланмаса ҳам бўлади. Лекин ҳозирча дисквалификация ўтаётган Рафиня ўзининг жамоадаги истиқболи бўйича ташвишга тушса арзийди.

Video thumbnail
{Yii::t(}
Ўтказиб юбориш 6s

«Селта» — «Реал» 0:1
Гол:
Беллингҳем (81). 
Аниқ ижро этилмаган пеналти: Родриго (69). 
Селта – Виляр, Мингеса, Старфелт, Нунес, Айду, Серви (Санчес, 45), Де Ла Торре (Родригес, 81), Белтран, Бамба, Аспас, Ларсен (Тапиа, 77).
Реал – Аррисабалага, Карвахал, Алаба, Рюдигер, Гарсия (Начо, 80), Валверде, Камавинга (Кроос, 62), Тчуамени (Модрич, 62), Беллингҳем, Винисиус (Хоселу, 18), Родриго.
Огоҳлантиришлар: Аспас (67), Кроос (71), Рюдигер (90+3), Тапиа (90+4), Начо (90+6). 

Испанияда тур жума оқшомида турнир жадвали пешқадами «Реал» навбатдаги уч очкосини олиши билан бошланганди. Аммо бу очколар катта машаққат билан қўлга киритилди.

Аввалига 18-дақиқадаёқ мадридликлар жамоаси етакчиларидан бири Винисиус Жуниор жароҳат олиб майдонни тарк этди. Кейинроқ As нашри бразилиялик вингернинг жароҳати жиддийроқ экани, футболчининг мушак пайлари узилиб кетгани, у октябр ойи ўрталарига қадар жамоага ёрдам бера олмаслигини ёзиб чиқди (у ЕЧЛ гуруҳ босқичидаги икки ўйин ва 24 сентябрга белгиланган «Атлетико»га қарши Мадрид дербиси қўшиб ҳисобланганда жами саккиз ўйинда қатнаша олмаслиги аниқ).

Эндиликда «Реал»нинг жароҳатдаги футболчилари сони олти нафарга етди, айни вақтда Карло Анчелотти Винисиусдан ташқари Куртуа, Милитао, Арда Гулер, Менди ва Себалйос каби футболчиларнинг хизматларидан фойдалана олмайди.

Иккинчи бўлимда эса жамоанинг бошқа бир бразилиялик вингери Родриго пеналтидан фойдалана олмади, бу ҳолатнинг алоҳидалиги шундаки, бош мураббий қанотда туриб тўпни Модрич тепиши кераклигини айтганига қарамай, зарбани Родриго ижро этди ва хато қилди.

Ўйиндан кейинги матбуот анжуманида мадридликлар устози бу эпизод борасида кескин фикр билдирди: «Бизда ким истаса ўша пеналти тепиб кетавермайди. Мен Валвердега Лука Модричнинг ўзи тепиши кераклигини айтдим. У ерда нима бўлганини билмайман. Улар Родригони танлашган ва мен Модрич тепиши кераклигини уларга етказишга улгурмадим. Бироз жаҳлим чиқди. Балки тушунмовчилик бўлгандир. Футболчигача овозим етиб бориши қийин эди».

Шундай асабий ўйинда барчасини яна Жуд Беллингҳем ҳал қилди. У ўйин охирларига бориб ғалаба голини урди ва интернетда навбатдаги таққосларни бошлаб берди. Масалан, у Азарнинг Мадриддаги тўрт йиллик фаолиятида урган жами голларини уч ўйиндаёқ уриб бўлгани ҳақидаги. У етакчилик қобилиятини ҳар жабҳада кўрсатмоқда, гоҳ мадридлик мухлислардан «Селта» билан ўйинда дебют қилган Кепани қўллаб-қувватлашни сўраса, гоҳ ўзи қаҳрамонлик кўрсатган ва ғалабани таъминлаган ўйиннинг энг яхши футболчиси сифатида Тчуаменини кўрсатди.

Бу ғалабадан кейин «Реал» лигада йўқотишсиз бораётган ягона жамоа сифатида турнир жадвалида яккапешқадамликни сақлаб қолди.

Италия: Моуринио жамоаси оқсамоқда

«Милан» — «Торино» 4:1
Голлар:
Пулишич (33), Жиру (43 пеналти, 65 пенальти), Эрнандес (45+2) — Схюрс (36). 
Милан – Менян, Калабрия, Томори, Тиав (Киер, 79), Эрнандес (Флоренци, 87), Крунич, Лофтус-Чик (Муса, 66), Рейндерс, Пулишич, Леау (Окафор, 66), Жиру (Чуквуэзе, 66).
Торино – Милинкович-Савич, Белланова (Лазаро, 59), Родригес, Схюрс, Буонжорно, Войвода, Влашич, Радонич (Карамо, 59), Илич (Линетти, 46), Риччи, Санабрия (Пеллегри, 22).

Мавсумлар оралиғида таркибни янгилаб олган «Милан» жуда ёрқин ўйин кўрсатмоқда. Ҳа, айтиш мумкинки, ҳисоб 1:1 эканида россонериларнинг омади келиб, тўп қўлга тегиши оқибатида меҳмонлар дарвозаси томон пеналти белгиланди. Аммо «Торино»нинг голи ҳам — биргина алоҳида эпизод бўлди. Ўйин жиҳатдан Стефано Пиоли жамоаси сезиларли даражада кучли эди.

Биринчи голни «Челси»дан келган футболчилар жуфтлиги юзага келтирди — Лофтус-Чик тўпни қулай қилиб етказиб берди ва Пулишич қаторасига иккинчи ўйинда гол муаллифи бўлди. Ўйиннинг ҳақиқий безаги эса — Рафаэл Леау ҳимоячилар орасидан ўтказиб берган тўпни Эрнандес ўткир бурчакдан туриб дарвозага йўллаши бўлди.

Анорранглилар жамоаси эса биринчи бўлим ўрталарида жароҳат олган Санабрия сафдан чиқиши билан ўз ҳужум салоҳиятини ҳам йўқотди. Леау эса 63-дақиқада яна бир пеналти ишлади (биринчи пеналти ҳам унинг узатмаси вақтида тўп рақиб ҳимоячиси қўлига текканида берилганди) ва Жиру зарбани яна аниқ ижро этди. У 36 ёшида «Милан»да А сериядаги икки йил олдинги дебютидан буён энг кўп гол урган футболчи бўлиб турибди (27 гол).

«Верона» — «Рома» 2:1
Голлар:
Дуда (4), Нгонж (45+3) — Ауар (56).
Верона – Монтипо, Давидович, Маняни, Хин, Дойг, Терраччано (Фараони, 63), Дуда (Бонаццоли, 71), Онгла, Фолоруншо (Сапонара, 88), Нгонж (Сердар, 63), Журич (Мбоула, 88).
Рома – Патрисиу, Кристенсен (Спинаццола, 46), Смоллинг, Лиоренте (Ал-Шаъровий, 46), Манчини, Залевски (Карсдорп, 51), Паредес (Ауар, 46), Кристанте, Пеллегрини, Дибала (Солбаккен, 68), Белотти.
Четлатиш: Хин (84).

«Рома» мавсумни муваффақиятсиз бошлади. Биринчи турда Римда «Салернитана»га қарши дурангдан кейин (бу ҳам ўйин охиридаги гол эвазига эришилганди), иккинчи тур ўйинида ҳам икки гол ўтказиб юборилди. Жозе Моуринио танаффусдаёқ уч футболчини алмаштирди. Биринчи бўлим қаҳрамони эса қайтган тўпга зарба бериб ҳисобни очган Дуду бўлди, у танаффус арафасида иккинчи голни урган Нгонгега голли узатма муаллифига айланди.

Меҳмонларнинг қўлидан келган максимум иш эса — иккинчи бўлимда Ауарнинг жавоб голи эвазига интригани қайтариш бўлди. Аммо «Верона» футболчиси 84-дақиқада майдондан четлатилиши ва ўйинга қўшиб берилган ўн дақиқа ҳам Моуринио шогирдларига ёрдам бермади, лекин мезбонлар ғалабани сақлаб қолишида омаднинг ҳам ҳиссаси бўлди.

«Ювентус» — «Болоня» 1:1
Голлар:
Влаҳович (80) — Фергюсон (24). 
Ювентус – Перин, Алекс Сандро, Данило, Бремер, Камбиязо (Айлинг, 66), Веа (Маккенни, 82), Рабио, Локателли (Йилдиз, 82), Фажоли (Погба, 66), Киеза (Милик, 74), Влаҳович.
Болоня – Скорупски, Пош, Лукуми, Бекема, Ликояннис (Корацца, 61), Моро (Домингес, 61), Эбишер (Ал Аззузи, 85), Фергюсон, Орсолини (Карлссон, 61), Ндойе (Фаббиан, 90), Зиркзее.
Огоҳлантиришлар: Рабио (12), Пош (17), Мотта (72), Йилдиз (87).

Биринчи бўлим «Ювентус»га биринчи турдан кейин ортиқча мақтов ёғдириб юборилганини кўрсатиб берди. Аммо иккинчи бўлим бошланганида Массимилиано Аллегри танаффусда яхши ишлаб, жамоани уйғота олгани кўринди. Лекин туринликларга ҳужумларни якунлашда аниқлик етишмади, Влаҳович Бреннер ташлаб берган тўпни эгаллаб, дарвозани ишғол этган бўлса-да, видеотакрордан кейин гол бекор қилинди, бу вазиятда офсайдга тушиб қолган Рабио дарвозабонга халақит бергани маълум бўлди.

Кейин эса Скорупски Веанинг зарбасини қайтарди, Фажоли хато зарба берди, Погбанинг узоқ кутилган қайтиши амалга ошди, шунингдек меҳмонлар мезбонлар дарвозасига пеналти белгилашни талаб қилишди. Пеналтига сабабчи бўлишига сал қолган Айлинг-Жуниор ўйин охирида Влаҳовичга ҳисобни тенглаштиришда ёрдам берди.

«Наполи» — «Сассуоло» 2:0
Голлар:
Осимҳен (16, пеналти), Ди Лоренцо (64). 
Наполи – Мерет, Ди Лоренцо, Жезус (Эстигор, 90), Рраҳмани, Оливера, Лоботка (Симеоне, 84), Зелински (Каюсте, 83), Замбо-Ангисса, Политано (Кварацхелия, 61), Распадори (Элмаз, 83), Осимҳен.
Сассуоло – Консили, Толян, Эрлич, Руан, Виня (Педерсен, 61), Лопес, Болока (Рачич, 61), Матеус Энрике, Байрами (Торстведт, 76), Лорянте (Сейде, 61), Пинамонти (Мулаттиери, 69).
Огоҳлантириш: Руан (29).
Четлатиш: Лопес (51).

Саломатлигидаги кичик муаммо туфайли биринчи турни ўтказиб юборган Кварацхелия «Сассуоло»га қарши ўйин қайдномасига киритилди. У захирада ўтирганида «Наполи» бир гол билан кифояланди, VAR аралашувидан кейин белгиланган пеналтини Осимҳен аниқ ижро этди. Иккинчи бўлимда бошида ҳам арбитр диққат марказида бўлди, у Лопеснинг тинимсиз луқма ташлашини қизил карточка билан жазолади.

Қаторасига иккинчи ўйинда 11 метрлик жарима зарбасини ижро этган Распадори тўпни осмонга қаратиб тепганидан кейин эса мураббий Хвичани ўйинга ташлашга қарор қилди. Гуржистонлик легионер ўзига хос нафислик билан Ди Лоренцога голли пас берганидан кейин ўйин масаласи амалда ҳал бўлди. Лучано Спаллетти кетганидан кейин «Наполи» ўйинида пасайиш бўлишини тахмин қилганлар адашди, амалдаги чемпионлар Руди Гарсия бошқарувида ҳам йўқотишсиз давом этмоқда.

Германия: Кейннинг дубли

«Боҳум» – «Боруссия» Д 1:1
Голлар:
1:0 – 13 Штегер, 1:1 – 56 Мален.
Боҳум – Риманн, Пасслак (Гамбоа, 81), Ордец, Машович, Бернардо, Виттек (Данило Соарес, 48), Лосилла, Штегер (Остерҳаге, 81), Беро, Асано (Антви-Аджей, 59), Хофманн (Брошински, 59).
Боруссия Д – Кобел, Ҳуммелс (Зюле, 46), Шлоттербек, Бенсебайни, Забитцер (Адейеми, 62), Жан, Брандт, Нмеча (Ўзжан, 81), Волф, Мален (Байно-Гиттенс, 81), Аллер (Мукоко, 81).

Биринчи турда нурсиз ўйин кўрсатган «Боруссия» Боҳумда яна муаммога дуч келди. Баҳорда дортмундликлар бу ерда тезкор гол ўтказиб юбориб, икки очко йўқотганди ва якунда айнан шу очколар чемпионлик пойгасида етмай қолганди. Бу сафар ҳам вазият такрорланди, Мален эса яна иккинчи бўлимда мағлубиятдан қутқарувчи ролини бажарди. Нидерландиялик ҳужумчи ўтган турда ҳам жавоб голини урганди ва бунда тўп газонга чўпчиб боргани ҳал қилувчи аҳамиятга эга бўлганди. Бу ўйинда эса у узоқ масофадан йўллаган зарбаси билан рақиб дарвозабонини ожиз қолдирди.

Аммо керакли натижа учун бутун жамоа ҳаракат қилиш керак, ҳозирча эса «асаларилар»нинг ўйини яхши таассурот қолдирмаяпти. «Реал»да жавлон ураётган Беллингҳемнинг кетиши Эдин Терзич жамоаси ўйинига жиддий зарба берди.

«Бавария» — «Аугсбург» 3:1
Голлар:
Удуоҳай (32, автогол), Кейн (40 пеналти, 69) — Белио (86). 
Бавария – Ульрайх, Мазрауи (Лаймер, 71), Упамекано, Ким Мин Жэ (де Лигт, 81), Дэвис, Горетцка, Киммиҳ, Коман (Гравенберҳ, 81), Сане (Тел, 71), Кейн, Гнабри (Мюллер, 71).
Аугсбург – Дамен, Удуоҳай, Бауэр, Педерсен, Дорш, Режбечай (Брайтҳаупт, 66), Варгас (Кардона, 66), Энгелс (Гумни, 83), Миҳел (Бельо, 66), Демирович, Бериша (Титц, 66).
Огоҳлантиришлар: Режбечай (56), Кардона (79), Гравенберҳ (83).

«Бавария» эса мавсумни кучли бошлади. Барчаси яхши йўлга қўйилганида кичик деталлар ҳам жамоа фойдасига хизмат қилади. Биринчи гол —  рикошетлар сериясидан кейин ҳимоячи тўпни дарвоза чизиғидан тепиб юбормоқчи бўлганида автогол сифатида урилди. Кейин эса VAR Киммиҳнинг зарбасидан кейин тўп рақиб жарима майдони ичида ҳимоячи қўлига текканини кўрсатди.

Кейн эса ўзининг намунали мерган эканини намойиш этмоқда. У энди мюнхенликларнинг штатдаги пеналтичиси, иккинчи гол урилган ҳужумда эса жамоадошлари билан бир-бирини тушунишда муаммо йўқлигини кўрсатди. Кейнга қадар «Бавария» сафида бундеслига стартидаги икки ўйинда уч гол уриш фақат икки футболчига насиб этганди — Густав Юнг (1967 йил) ва Адолфо Валенсия (1993 йил).

Франция: Луис Энрикенинг илк ғалабаси

«ПСЖ» — «Ланс» 3:1
Голлар:
Асенсио (45), Мбаппе (52, 90+1) — Гилавоги (90+5). 
ПСЖ – Доннарумма, Ҳакими, Маркиниос, Шкриняр, Эрнандес (Данилу, 83), Угарте, Витиня, Заир-Эмери (Солер, 86), Дембеле (Руис, 80), Асенсио, Мбаппе.
Ланс – Самба, Гради, Данзо, Медина, Мачадо, Франковски (Ле Кардиналь, 46), Томассон (Ваи, 58), Фюлжени (Гилавоги, 74), Абдул Самад (Спирингс, 46), Диуф (Коста, 83), Сотока.
Огоҳлантиришлар: Медина (19), Сотока (42), Спирингс (79).

Луис Энрике таркибни мукаммаллаштиришга уринишда давом этмоқда ва бу сафар — «Айнтрахт»дан Коло-Муани трансфери амалга ошиши арафасида — яққол марказий ҳужумчисиз схема танланди. Амалда Асенсио «алдамчи тўққизлик» вазифасини бажарди ва айнан у биринчи бўлим охирида жарима зарбасидан кейин тўпни дарвозанинг пастки бурчагига аниқ йўллади.

Бунгача ҳам «ПСЖ»га олдинги ўйинларда етишмаган кескинлик Мбаппе томонидан яратиб турилди. Вазиятлардан бирида, Дембеле билан бирга уюштирилган ҳужумда форвард дарвозабонни алдай олмади. Килианнинг ҳаводаги тўпни тўхтатмай берган бошқа бир зарбасини эса «Ланс» ҳимоячиси тўхтатди.

Якунда форвард ўз мақсадига фақат танаффусдан кейин эриша олди ва унинг ҳужумни гол билан якунлаши ўзидан кўра парижликлар бош мураббийини кўпроқ қувонтирди. Аммо бу вақтда Энрике ҳам, унинг асосий юлдузи ҳам «Парк де Пренс»даги гол тарихий  бўлганини ҳали билмасди. Ўйин охирида яна бир бор дарвозани ишғол этган Мбаппенинг «ПСЖ» сафидаги гол ва голли паслари сони 301 тага етди (215+86), амалдаги чемпион эса — мавсумдаги илк ғалабага эришди. Бу Энрике учун ўтган йил ноябридан буён қўлга киритилган илк ғалаба бўлди, у ўшанда Испания миллий жамоаси бошқарувида ЖЧ-2022 турниридаги ягона ғалабасига эришганди, Коста-Рика йирик ҳисобда таслим этилган (7:0) ва гуруҳдан иккинчи ўрин билан чиқилган бўлса-да, испанлар плей-оффда Марокашга пеналтилар сериясида мағлуб бўлганди.

Ҳафта статистикаси

  • Бу мавсумда «Маллорка» ҳужумчиси Муричи 2 пеналтидан фойдалана олмади, у бунга қадар етти бор «нуқта»га яқинлашиб, олти гол урганди.
  • «Арсенал» ўтган мавсум бошидан буён 21 та уй учрашувида фақат 4 тасида дарвоза дахлсизлигини сақлаб қола олган. Бу давр оралиғида бундан ёмонроқ натижа фақат «Фулҳэм» томонидан қайд этилган (3). Бундан ташқари, «канонирлар» АПЛ тарихида бир календар йилида учта ўйинда биринчи дақиқадаёқ гол ўтказиб юборган биринчи жамоа бўлди.
  • Мавсум стартидаги икки ўйинда «Волфсбург» тўртта гол урди ва бу голларнинг барчаси Винд номига ёзилди.
  • Англия чемпионатида уч турда ўтказилган 29 ўйинда 9 марта қизил карточка кўрсатилди. Айни вақтда ўртача ҳар 3,2 ўйинда бир футболчи майдондан четлатилмоқда, бу турнир тарихидаги рекорд кўрсаткич.
  • Йил бошидан буён «Фиорентина»нинг 10 футболчиси бош билан гол урган. Флоренцияликлар бу борада топ-5 лигаларда фақат «Унион» вакилларидан (11) ортда.
  • Юрген Клопп Эдди Ҳау бошқарувидаги жамоаларга қарши ўйинларда 11 ғалабага эришди. Бу АПЛ тарихидаги мураббийлар дуэлларидаги энг узоқ давом этган серия.
  • Сафар ўйинларида рақиб дарвозаси соҳаси томон аниқ йўлланган 11 зарба — «Барселона»нинг Хави бошқарувидаги энг яхши натижаси.
  • «Ливерпул» АПЛ тарихида 90-дақиқадан кейин 42 марта  ғалаба голин урган ва бу борада рекордчи ҳисобланади.
  • «Манчестер Сити» Гвардиола даврида пеналтилардан фақат 70 фоизини (61 тадан 43 та) аниқ ижро этган.
  • «Севиля» ҳужумчиси Ан-Носирий ла лигада 200-ўйинини ўтказди, турнинг яна бир юбиляри «Жирона» фахрий ҳужумчиси Стуани бўлди. Уругвайлик — каталонияликларнинг Испания юқори дивизионида дастлабки 100 ўйин ўтказган илк футболчисига айланди.

Мавзуга оид