Мессининг Instagram пости рекорд даражада лайк йиғди

Аргентина миллий жамоаси сардори Лионел Мессининг Instagram ижтимоий тармоғида жаҳон чемпионатидаги ғалабаси ҳақида ёзган пости рекорд даражада кўп «лайк» йиғди.

Фото: Getty Images

Мессининг Аргентина миллий жамоаси ғалабасини байрам қилаётган футболчилар сурати жойлаштирилган постига ҳозирги вақтда 63 миллиондан ортиқ «лайк» босилган.

Олдинги рекорд world_record_egg аккаунтига тегишли бўлиб, оқ фондаги оддий тухум сурати 56,2 миллион «лайк» тўплаган эди.

«Жаҳон чемпионимиз! Мен буни жуда орзу қилардим, шунчалик хоҳлардимки, ҳалигача ишонмаяпман», - деб ёзди Месси сурат тагида. У ўз оиласига ва жамоани қўллаб-қувватлаган барчага миннатдорчилик билдирди ва бу алоҳида футболчининг эмас, балки бутун жамоанинг ғалабаси эканини таъкидлади.

18 декабр куни Қатардаги «Лусаил» стадионида Франция ва Аргентина миллий жамоалари ўртасида ЖЧ-2022 финали ўтказилди. Жамоалар асосий вақтда дуранг ўйнашди, аммо Аргентина пеналтилар сериясида ғалаба қозона олди. Бу аргентиналикларнинг тарихдаги учинчи ғалабаси бўлди. Бундан олдин улар 1978 ва 1986 йилда жаҳон чемпиони бўлишган эди.

#Аргентина #Футбол #Лионел Месси