Samsung фойдаланувчиларга смартфонларни мустақил таъмирлашни ўргатади

Samsung ва iFixit смартфонларни мустақил таъмирлаш имконини берадиган иловани тайёрламоқда.

Фото: Unsplash

Samsung компанияси фойдаланувчиларга ўз маҳсулотларини уй шароитида мустақил равишда таъмирлашда ёрдам берадиган иловани чиқаришни режалаштирмоқда.

Бу ҳақда компаниянинг АҚШ Патент ва товар белгилари бўйича идорасига топширган аризасидан маълум бўлган. Ҳужжатда хизмат Self Repair Assistant деб номланган.

Компания уни смартфонлар, ақлли соатлар, планшетлар ва минигарнитураларни мустақил равишда таъмирлаш ва техник хизмат кўрсатиш имконини берадиган «мобил телефон учун амалий дастур» деб таърифлайди. Тавсифга қўшимча равишда илова белгиси ҳам тасвирланган. У кўк квадрат ичидаги тишли оқ доирага жойлаштирилган калитдан иборат.

The Verge тахминига кўра, иловада Samsung Galaxy сериясидаги қурилмаларни таъмирлаш бўйича кўрсатмалар бўлади. Катта эҳтимол билан Self Repair Assistant иловасининг ишлаб чиқарилиши 2022 йил бошида эълон қилинган Samsung ва iFixit ўртасидаги ҳамкорлик натижасидир.

#Samsung #iFixit