IBM дунёдаги энг кучли процессорни тақдим қилди

International Business Machines (IBM) корпорацияси дунёдаги энг кучли Osprey квант процессорини ишлаб чиқарганини эълон қилди.

Фото: IBM

Суперпроцессор қуввати 433 квант бит ёки кубитни ташкил қилади. Қубит - квант компютерларидаги энг кичик ахборот бирлигидир. Бундай компютерлар 0 ёки 1 қийматига эга бўлган оддий битлар билан эмас, балки бир вақтнинг ўзида 0 ва 1 қийматига эга бўлган кубитлар билан ишлайди. Анъанавий битли компютерлардан фарқли ўлароқ, квант компютерлари бир вақтнинг ўзида исталган маълумотларни миллион марта тезроқ қайта ишлашга қодир.

IBM корпорациясининг янги процессорли квант компютери олдингисидан уч баробар катта қувватга эга. Умуман олганда, компания бутун дунё бўйлаб йигирмадан ортиқ квант компютерларига эга.

IBM вакили Дарио Гил сўзларига кўра, компания 1000 кубитдан ортиқ қувватга эга процессорни яратиш ва ишга тушириш устида ишламоқда.

Osprey квант процессори нархи маълум қилинмади. Аввалроқ, Канаданинг D-Wave компанияси нархи 15 миллион долларлик квант компьютерини ишлаб чиқарганини эълон қилган эди.

#IBM #квант компютери