Ўзбекистон ва АҚШ ўртасида стратегик шериклик мулоқотлари бошланди

Тошкентда илк марта янги даражадаги саммит – Ўзбекистон–АҚШ Стратегик шериклик мулоқотининг илк йиғилиши бўлиб ўтди. Бешта секцияга бўлинган мулоқотлар доирасида ҳамкорликнинг кўплаб жиҳатлари кўриб чиқилди. Икки томонлама солиққа тортишдан қочиш тўғрисида битим тузилиши мумкин.

Фото: Ўзбекистон Ташқи ишлар вазирлиги

13 декабр куни Тошкентда Ўзбекистон ва АҚШ ўртасидаги Стратегик шериклик мулоқотининг биринчи учрашуви бўлиб ўтди.

Мазкур мулоқотнинг бошланишини – томонлар ўзаро ҳамкорликни кенгайтириш ниятида эканидан далолат, дея қайд этди Ўзбекистон ташқи ишлар вазири Абдулазиз Комилов тадбир аввалида.

Мулоқотда Америка томонига давлат котибининг Жанубий ва Марказий Осиё ишлари бўйича ёрдамчиси Дональд Лу раҳбарлик қилди.

Кун давомида мулоқотлар бешта секцияга бўлинган ҳолда ташкил этилди, уларда сиёсий, иқтисодий, маданий, хавфсизлик ва инсон ҳуқуқлари ТИВ расмий релизига кўра, учрашувда АҚШнинг Ўзбекистон Республикаси мустақиллиги, суверенитети ва ҳудудий яхлитлигини қўллаб-қувватлаш борасидаги доимий ва қатъий позицияси яна бир бор тасдиқланди. АҚШ ҳукумати Ўзбекистонда иқтисодиётни либераллаштириш, инсон ҳуқуқларини ҳимоялаш, демократик институтлар ва фуқаролик жамиятини ривожлантириш борасидаги ишларни фаол қўллаб-қувватлашга тайёрлиги маълум қилинди.

Томонлар "C5+1" механизми доирасидаги ўзаро ҳамкорликни жадаллаштириш ва ушбу форматни салмоқли натижаларга эришиш даражасига олиб чиқиш лозимлигини қайд этди.

Делегациялар терроризм ва экстремизм таҳдидларига қарши курашиш, Афғонистонда тинчлик жараёнини илгари суриш, мамлакатни можародан кейинги тиклаш ва афғон халқига гуманитар ёрдам кўрсатиш бўйича биргаликдаги саъй-ҳаракатларни давом эттиришга келишиб олди.

Дональд Лу ва Абдулазиз Комилов
Фото: Ўзбекистон Ташқи ишлар вазирлиги

Ўзбекистон-АҚШ стратегик шериклигини аниқ йўналишлар бўйича институционаллаштириш, шунингдек, Инвестицияларни ўзаро ҳимоя қилиш ҳамда Икки томонлама солиққа тортишдан қочиш тўғрисида Битимлар тузиш бўйича музокаралар жараёнини бошлаш бўйича таклифлар кўриб чиқилди.

Ўзбекистон Сенати раисининг биринчи ўринбосари Содиқ Сафоев “Ўзбекистон 24”га берган интервюсида айтишича, пандемия даврида АҚШ Ўзбекистонга 5 млн дозадан кўпроқ Pfizer ва Moderna вакциналарини беғараз ёрдам сифатида юборган.

АҚШнинг Ўзбекистондаги фавқулодда ва мухтор элчиси Дэниел Розенблюм
Фото: Ўзбекистон Ташқи ишлар вазирлиги

Маълумот учун, Ўзбекистон ва АҚШ ўртасида Стратегик шериклик тўғрисидаги декларация 2002 йилда имзоланган.

2018 йил май ойида президент Шавкат Мирзиёев Вашингтонга давлат ташрифи билан бориши ортидан муносабатларда сезиларли жонланиш кузатилди, турли йўналишлардаги делегациялар тез-тез Тошкент ва Вашингтонда учрашувлар ўтказа бошлади.

2020 йил ноябрь ойида икки мамлакат сиёсий маслаҳатлашувларининг 8-раунди якунида томонлар йиллик маслаҳатлашувларни Стратегик ҳамкорлик мулоқоти даражасига кўтариш тўғрисидаги қарор қабул қилганди.

#АҚШ #ташқи сиёсат #Ўзбекистон-АҚШ