«Central Park» 335 млн сўмдан ортиқ маблағни ташриф буюрувчиларга қайтариб беради

Истеъмолчилар ҳуқуқларини ҳимоя қилиш агентлигига мурожаат қилган истеъмолчининг ҳисобидан Тошкент шаҳридаги Мирзо Улуғбек номидаги “Марказий боғ” (“Central Park”) учун олинган картадаги 60 минг сўм пул маблағи огоҳлантиришсиз ечиб олинган. 

Агентлик хабарига кўра, ушбу масалани ўрганиш жараёнида мазкур истироҳат боғи ҳудудида фойдаланиш учун мўлжалланган карталар билан боғлиқ муаммо яна бир неча минг истеъмолчиларга ҳам тааллуқли экани маълум бўлган.

“Тўлов картанинг орқа томонида унинг амал қилиш муддат кўрсатилган. Муддат тугагандан сўнг, ундаги маблағлар карта эгаси аризасига асосан хизмат кўрсатувчи касса томонидан 3 кунлик муддатда янги карталарда ўтказиб берилади. Аслида, махсус карталарнинг амал қилиш муддати 2020 йил 31 декабргача деб кўрсатилган. Лекин 2020 йил тугаши арафасида карта амал қилиш муддати ва уларни алмаштириш тартиблари ҳақида истеъмолчилар бирон марта ҳам огоҳлантирилмаган. Истироҳат боғига борган истеъмолчи картадан фойдалана олмагандан сўнггина бу ҳақда хабардор бўлган”, дейилади маълумотда.

“Истеъмолчиларнинг ҳуқуқларини ҳимоя қилиш тўғрисида”ги қонун 6-моддасига асосан, ишлаб чиқарувчи (ижрочи, сотувчи) истеъмолчига ўзи реализация қилаётган товар (иш, хизмат)лар ҳақида ўз вақтида зарур, тўғри ва тушунарли маълумот бериши шарт. Шунингдек, 21-моддага асосан, сотувчи (ижрочи) истеъмолчини ҳақ эвазига қўшимча товарлар сотиб олишга ёки қўшимча хизматлардан фойдаланишга қисташга, шунингдек кўрсатилмаган хизматлар учун ҳақ олишга ҳақли эмаслиги белгиланган.

Агентлик ушбу ҳолатларга аниқлик киритиш мақсадида “Jet Invest” МЧЖ ҚКга тегишли сўровнома юбориб, ҳолат юзасидан тушунтириш олинди. 

Унга асосан, 2018 йилдан буён “Jet Invest” МЧЖ ҚКга тегишли “Марказий боғ” (“Central Park”) томонидан 130 000та истеъмолчига боғда фойдаланиш карталари расмийлаштириб берилган. Амал қилиш муддати ўтган 18 291та махсус картада истеъмолчиларнинг ҳисобрақамларида 335 610 000 сўм мавжуд экани ҳақида маълумот бериб ўтилган. 

“Истироҳат боғи маъмурияти таъкидлашича, пандемия пайтида тўлов тизимида техник носозлик юзага келгани муаммога сабаб бўлган. Агентликнинг кўрсатмасига асосан бугунги кунга қадар мазкур истироҳат боғи томонидан 643та истеъмолчига 14 872 400 сўм маблағ қайтарилди”, дейилган хабарда.

Қайд этилишича, бугунги кунда Мирзо Улуғбек номидаги “Марказий боғ” (“Central Park”) маъмурияти томонидан истеъмолчиларга ўрнатилган тартибда карталаридаги маблағларини қайтариш давом этмоқда. Бунинг учун истеъмолчилар касса ходимига мурожаат қилиши керак. Шундан сўнг  картадаги баланс текширилади ва унда қолган маблағ янги картага ўтказиб берилади.