Rubio: Putin bilan tinchlik to‘g‘risida "cheksiz muzokaralar" bo‘lmaydi

Prezident Donald Tramp «cheksiz muzokaralar tuzog‘iga tushmaydi», dedi AQSh davlat kotibi Marko Rubio NATO tashqi ishlar vazirlarining 4 aprel, juma kuni Bryusselda bo‘lib o‘tgan yig‘ilishidan so‘ng. "Rossiya tinchlikni istayotgani yoki aksincha niyatda ekanini tez orada, oylar emas, balki haftalar ichida bilib olamiz", - dedi u. Agar mojaro tarafi tinchlikdan manfaatdor bo‘lsa, u harbiy harakatlarni to‘xtatadi va oqilona talablar qo‘yadi, deb ta’kidladi Rubio. «Bu aqldan ozgan talablar emas, oqilona shartlar bo‘lishi kerak», deb qo‘shimcha qildi Davlat departamenti rahbari.

Marko Rubio, shuningdek, agar rus qo‘shinlari Ukrainada yangi hujum uyushtirsa, «shundan keyin ular tinchlikni xohlaydimi yoki yo‘qmi, ma’lum bo‘ladi», dedi. «Agar bu bo‘lmasa, biz siyosatimizni o‘zgartirishimiz uchun buni oldindan bilishimiz kerak», deb tushuntirdi u. Davlat kotibining so‘zlariga ko‘ra, aynan Rossiya tomoni avvalroq Ukrainada o‘t ochishni to‘liq to‘xtatishdan bosh tortgan. Uning aniqlik kiritishicha, AQSh Kongressi allaqachon Moskvaga qarshi qo‘shimcha sanksiyalar to‘g‘risidagi qonun loyihasi ustida ishlay boshlagan va Vashington tomonidan bosimni kuchaytirishga va’da bergan.

Amerika diplomatiyasi rahbari, shuningdek, Qo‘shma Shtatlar Rossiya-Ukraina urushida keng qamrovli o‘t ochishni to‘xtatishga zudlik bilan erishishni to‘g‘riroq deb bilishini ta’kidladi. Biroq, uning aytishicha, Vashington Qora dengizda o‘t ochishni to‘xtatish va energetika obektlariga zarbalarni bas qilish g‘oyasi ustida ishlashga rozi bo‘lgan, chunki uning fikricha, bu ham «oldinga siljish hisoblanadi». «Har ikki tomon ham bu sulh buzilayotganiga ishonishi aniq, bu shunday cheklangan otashkesimlarga xosdir», dedi davlat kotibi.