Tramp tariflari ortidan dollar va fond indekslari quladi

Fond indekslari quladi, sarmoyadorlar savdo urushi va global retsessiyadan qo‘rqib, mablag‘larni obligatsiyalar, oltin va iyenaga tikmoqda. Jahon bozori (jumladan, Qo‘shma Shtatlar) Donald Trampning import qilinadigan tovarlarga boj tariflarini joriy etishiga shunday munosabatda bo‘ldi, deb yozdi Reuters.

Tramp buni «Ozodlik kuni» deb atadi. Ammo dollar kursi olti oylik davrdagi eng past darajaga tushdi va AQSh obligatsiyalarining daromadliligi pasaydi.

Fitch Ratings ma’lumotlariga ko‘ra, AQSh o‘rtacha import solig‘i 2024 yildagi 2,5 foizdan Tramp davrida 22 foizga oshgan, bu 1910 yildan beri kuzatilmagan hodisa. Barclays tahlilchilari boj tariflarining oshishi narxlarning ko‘tarilishiga, sarmoyalarning qisqarishiga va iqtisodiy o‘sishning sekinlashishiga olib kelishidan ogohlantirmoqda. Investorlar Trampning keyingi harakatlarini va boshqa mamlakatlardan ehtimoliy javob choralarini kutishmoqda.

3 aprel kuni Tramp butun dunyo uchun importga 10 foizlik asosiy tarifni e’lon qildi, ammo ayrim mamlakatlar uchun tariflar sezilarli darajada yuqori. Masalan, Xitoy tovarlari uchun 34%, Yaponiya uchun 24%, Vetnam uchun 46%, Janubiy Koreya uchun 25% bo‘ladi. Yevropa Ittifoqiga 20 foizlik boj joriy qilindi. Rossiya va Shimoliy Koreya uchun tarif 10% bazaviy darajada qoldi.

Bojlar po‘lat, alyuminiy, mis, oltin va boshqa muhim tovarlarni yetkazib berishga taalluqli emas. Bundan tashqari, bojlar avtomobil qismlari, farmatsevtika mahsulotlari, yarim o‘tkazgichlar, yog‘och va «AQShda mavjud bo‘lmagan energiya va boshqa ba’zi mineral resurslar» importiga taalluqli emas.